वाहतूक सेवा समितीचे महाराष्ट्र राज्याध्यक्ष रवी नाईक यांचा वाढदिवस पनवेल येथे उत्साहात साजरा.
राष्ट्रीय संस्थापक अध्यक्ष मा. विजयजी सूर्यवंशी यांच्या प्रमुख उपस्थितीत सत्कार; केक कापून जल्लोषात वाढदिवस साजरा.
पनवेल प्रतिनिधी : राष्ट्रीय पुरोगामी पत्रकार संघ संचलित वाहतूक सेवा समितीचे महाराष्ट्र राज्याध्यक्ष रवीजी नाईक यांचा वाढदिवस पनवेल येथील शासकीय विश्रामगृहात अत्यंत उत्साहात आणि जल्लोषपूर्ण वातावरणात साजरा करण्यात आला. यावेळी केक कापून वाढदिवसाचा आनंद साजरा करण्यात आला.
कार्यक्रमात राष्ट्रीय पुरोगामी पत्रकार संघाचे राष्ट्रीय संस्थापक अध्यक्ष मा. विजयजी सूर्यवंशी यांच्या हस्ते रवी नाईक यांचा शाल, पुष्पगुच्छ व सन्मानचिन्ह देऊन सत्कार करण्यात आला. त्यानंतर राष्ट्रीय सचिव प्रवीण परमार तसेच उपस्थित पदाधिकारी व कार्यकर्त्यांनी रवी नाईक यांना केक भरवून वाढदिवसाच्या शुभेच्छा दिल्या.
यावेळी मार्गदर्शन करताना मा. विजयजी सूर्यवंशी यांनी रवी नाईक यांच्या कार्याचे तोंडभरून कौतुक केले. वाहतूक सेवा समितीच्या माध्यमातून त्यांनी संपूर्ण महाराष्ट्रात संघटन मजबूत करण्यासाठी केलेले कार्य, चालक-मालकांच्या प्रश्नांसाठी घेतलेली भूमिका आणि त्यांचे दिलदार, धाडसी व नेतृत्वक्षम व्यक्तिमत्त्व यांचा गौरव केला. रवी नाईक यांच्यासारखे कार्यकर्ते ही संघटनेची खरी ताकद असल्याचे त्यांनी नमूद केले.
यावेळी माधवराव खेरडे, राजपाल शेगोकार आणि प्रवीण नाईक यांनीही मनोगत व्यक्त करून रवी नाईक यांच्या कार्याचे तोंडभरून कौतुक केले व त्यांना वाढदिवसाच्या शुभेच्छा दिल्या. उरण तालुका अध्यक्ष प्रवीण नाईक यांनी रवी नाईक यांना छत्रपती शिवाजी महाराजांची आकर्षक तसबीर भेटवस्तू म्हणून प्रदान करून त्यांचा सन्मान केला.
या कार्यक्रमास राष्ट्रीय संस्थापक अध्यक्ष विजय सूर्यवंशी, राष्ट्रीय सचिव प्रवीण परमार, वाहतूक सेवा समितीचे राज्य सचिव माधवराव खेरडे, रायगड जिल्हा सचिव राजपाल शेगोकार, रायगड जिल्हा कार्याध्यक्ष सचिन गायकवाड, रायगड जिल्हा उपाध्यक्ष दत्तू ठोके, उरण तालुका अध्यक्ष प्रवीण नाईक, अन्याय अत्याचार निवारण समिती महिला रायगड जिल्हा अध्यक्षा अश्विनी ठाकूर तसेच अनिकेत शेगोकार उपस्थित होते.
सत्काराला उत्तर देताना रवी नाईक यांनी उपस्थित सर्व ज्येष्ठ पदाधिकारी, पत्रकार बांधव, कार्यकर्ते व सहकाऱ्यांचे मनःपूर्वक आभार मानले. “आपण सर्वांनी माझ्यावर असेच प्रेम, विश्वास आणि आपुलकी कायम ठेवावी. आपल्या सर्वांच्या सहकार्याने भविष्यातही वाहतूक क्षेत्रातील बांधवांसाठी आणि समाजहितासाठी अधिक जोमाने कार्य करत राहीन,” असे त्यांनी सांगितले. कार्यक्रमाची सांगता सर्व उपस्थितांचे आभार मानून उत्साहपूर्ण वातावरणात करण्यात आली.