फिट इंडिया अभियानाला बळ; नांदेडमध्ये २७ वी भव्य चालण्याची स्पर्धा उत्साहात.
नांदेड प्रतिनिधी : पंतप्रधान नरेंद्र मोदी यांच्या ‘फिट इंडिया’ संकल्पनेला बळ देण्यासाठी भाजपच्या योग सप्ताहानिमित्त धर्मभूषण ॲड. दिलीप ठाकूर यांच्या पुढाकारातून आयोजित करण्यात आलेल्या २७ व्या भव्य चालण्याच्या स्पर्धेला नागरिकांचा उत्स्फूर्त प्रतिसाद लाभला. श्रीराम सेतू पुल, गोवर्धन घाट येथे आयोजित स्पर्धेचे उद्घाटन माजी पालकमंत्री डी. पी. सावंत व महापौर कविता मुळे यांच्या हस्ते तिरंगा झेंडा दाखवून करण्यात आले. स्पर्धेत तब्बल ३२२ स्पर्धक सहभागी झाले.
भाजपा महानगर नांदेड, लायन्स क्लब नांदेड सेंट्रल आणि अमरनाथ यात्री संघ यांच्या संयुक्त विद्यमाने हा कार्यक्रम पार पडला. प्रारंभी भारतीय जनसंघाचे संस्थापक डॉ. श्यामाप्रसाद मुखर्जी यांच्या स्मृतिदिनानिमित्त त्यांच्या प्रतिमेला पुष्पहार अर्पण करून अभिवादन करण्यात आले.
यावेळी महापौर कविता मुळे, भाजप जिल्हा सरचिटणीस सुषमा थोरात, उपाध्यक्षा शततारका पांढरे आदींनी मार्गदर्शन करताना ॲड. दिलीप ठाकूर यांच्या गेल्या २७ वर्षांपासून सुरू असलेल्या सामाजिक व आरोग्य जनजागृतीच्या कार्याचे कौतुक केले. तसेच आगामी अमरनाथ यात्रेसाठी यात्रेकरूंना शुभेच्छा दिल्या.
स्पर्धेतील विविध गटांतील विजेत्यांना स्नेहलता जायसवाल यांच्या वतीने मोबाईल फोन तर विजयसिंह परदेशी यांच्या वतीने आकर्षक स्मृतिचिन्हे देऊन गौरविण्यात आले. कार्यक्रमाचे सूत्रसंचालन सुभाष देवकत्ते यांनी केले.
गेल्या २७ वर्षांपासून नागरिकांमध्ये नियमित चालण्याची सवय, आरोग्याविषयी जागरूकता आणि निरोगी समाज निर्मितीचा संदेश देण्यासाठी ॲड. दिलीप ठाकूर सातत्याने या स्पर्धेचे आयोजन करीत असून त्यांच्या या उपक्रमाचे सर्व स्तरांतून कौतुक होत आहे.