देगलूर प्रतिनिधी : अडत व्यापारी शिक्षण संस्था संचलित देगलूर महाविद्यालयातील अर्थशास्त्र विभाग व फोरम ऑफ इंटरप्रायझेस यांच्या संयुक्त विद्यमाने ६० वी ए. डी. श्रॉफ वक्तृत्व स्पर्धा उत्साहात संपन्न झाली. या स्पर्धेला विद्यार्थ्यांचा उत्स्फूर्त प्रतिसाद मिळाला असून, विद्यार्थ्यांनी मोठ्या संख्येने सहभाग नोंदविला.
स्पर्धेत महादेवी दाणेवार यांनी प्रथम क्रमांकाचे पारितोषिक मिळविले. सुकन्या चिंतलवार यांनी द्वितीय, तर ऋतुजा राजुरे यांनी तृतीय क्रमांकाचे पारितोषिक पटकावले. तसेच उत्तेजनार्थ पारितोषिक सानिका वधेवार यांना मिळाले. नबीरा महरीन, शिवानी धानके आणि गायत्री चौपावार यांनाही उत्तेजनार्थ बक्षिसे देण्यात आली.
कार्यक्रमाच्या अध्यक्षस्थानी महाविद्यालयाचे प्राचार्य डॉ. मोहन खताळ होते. स्पर्धेचे परीक्षक म्हणून प्रा. संतोष येरावार, प्रा. विनय भोगले, प्रा. सुरेश काशीदे आणि प्रा. साईआकाश रोटे यांनी काम पाहिले. यावेळी परीक्षकांनी विद्यार्थ्यांच्या विचार मांडणीचे कौतुक केले. अशा वक्तृत्व स्पर्धांमुळे विद्यार्थ्यांमध्ये अर्थशास्त्रीय जाण, चिकित्सक विचार करण्याची क्षमता आणि वक्तृत्व कौशल्य विकसित होण्यास मदत होते, असे मत त्यांनी व्यक्त केले.
स्पर्धेदरम्यान विद्यार्थ्यांनी विविध विषयांवर आपले विचार प्रभावीपणे मांडले. त्यांच्या मांडणीतून अर्थशास्त्राकडे पाहण्याचा चिकित्सक दृष्टिकोन प्रकर्षाने जाणवून आला. कार्यक्रमाचे संयोजन अर्थशास्त्र विभागप्रमुख डॉ. अशोक टिपरसे यांनी केले, तर सूत्रसंचालन डॉ. सर्जेराव रणखांब यांनी केले. यावेळी महाविद्यालयातील प्राध्यापक, कर्मचारी आणि विद्यार्थी मोठ्या संख्येने उपस्थित होते.