नांदेड प्रतिनिधी दि.०४:- गत २४ वर्षांपासून सातत्याने होत असलेल्या भव्य गोदावरी गंगापूजन सोहळ्याची नोंद यंदा लंडन बुक ऑफ वर्ल्ड रेकॉर्ड्स मध्ये झाली आहे. या रौप्यमहोत्सवी विश्वविक्रमी सोहळ्याचे उद्घाटन आमदार सौ. श्रीजया चव्हाण यांच्या हस्ते बुधवार, ५ नोव्हेंबर रोजी सायं. ५ वाजता नगीनाघाटावर होणार आहे.
या ऐतिहासिक क्षणाचे साक्षीदार होण्यासाठी नागरिकांनी गुलाबी रंगाचे वस्त्र परिधान करून उपस्थित राहावे, असे आवाहन संयोजक धर्मभूषण ॲड. दिलीप ठाकूर यांनी केले आहे.
गेल्या दोन दशकांहून अधिक काळ विशिष्ट ड्रेस कोड मध्ये पार पडणाऱ्या या सोहळ्याने जगभरातील विक्रमनोंद संस्थांचे लक्ष वेधले आहे. लंडन बुक ऑफ वर्ल्ड रेकॉर्ड्सचे भारताचे चेअरमन डॉ. अविनाश सकुंडे आणि उपाध्यक्ष डॉ. उत्तम मांढरे हे प्रत्यक्ष उपस्थित राहून नांदेडकरांचा सन्मान करणार आहेत.
गुलाबी साडी परिधान करून वेळेवर येणाऱ्या ५,००० महिलांना मोफत द्रोण, दिवे, फुले आणि आकर्षक बक्षिसे देण्यात येणार आहेत.
कार्यक्रमाला माजी मुख्यमंत्री खा. अशोकराव चव्हाण, खासदार डॉ. अजित गोपछडे, भाजपा प्रदेश संघटन मंत्री संजय कोडगे, माजी मंत्री डी.पी. सावंत, जिल्हाधिकारी राहुल कर्डीले, विशेष पोलीस महानिरीक्षक शहाजी उमाप, पोलीस अधीक्षक अबिनाशकुमार, मनपा आयुक्त डॉ. महेश डोईफोडे, तसेच भाजपा अध्यक्ष अमरनाथ राजुरकर आदी मान्यवर उपस्थित राहणार आहेत.
भाजपा महानगर नांदेड, लायन्स क्लब नांदेड सेंट्रल आणि अमरनाथ यात्री संघ यांच्या संयुक्त विद्यमाने हा उपक्रम राबविला जातो. शेकडो महिला एकाच वेळी गंगेची आरती करून हजारो दिवे सोडतात — हे दृश्य पाहण्यासाठी दरवर्षी नगीनाघाटावर प्रचंड गर्दी उसळते.
हरिद्वार आणि वाराणसीनंतर नांदेडची गंगा आरती तिसऱ्या क्रमांकावर असल्याची नोंद करण्यात आली आहे. व्यापारी योगेश जायस्वाल यांच्या वतीने दरवर्षीप्रमाणे यंदाही मोफत द्रोण, दिवे आणि फुले देण्यात येणार असून सर्वोत्कृष्ट पूजाथाळी सजविणाऱ्या २१ महिलांना विशेष पारितोषिके दिली जातील.
नगरसेवक डिंपल नवाब यांच्या वतीने भव्य आतिषबाजी, संस्कार भारती तर्फे विशाल रांगोळी, आणि सालासार भजन मंडळ यांच्याकडून सवाद्य पाच आरत्या सादर केल्या जातील.
शास्त्रोक्त पूजन संतोषगुरु परळीकर यांच्या मार्गदर्शनाखाली पार पडेल.यावेळी माध्यम प्रतिनिधी, “मायेची उब”, “भाऊचा माणुसकीचा फ्रिज” आणि “लायन्सचा डबा” या समाजोपयोगी उपक्रमांच्या अन्नदात्यांचा विशेष सन्मान करण्यात येणार आहे. तसेच विविध धार्मिक यात्रांसाठी नोंदणी केलेल्या भाविकांचाही गौरव होईल.
कार्यक्रमानंतर गुरुद्वारा लंगर साहिब तर्फे महाप्रसादाचे आयोजन करण्यात आले आहे.
नांदेडकरांनी या ऐतिहासिक व विश्वविक्रमी सोहळ्याला मोठ्या संख्येने उपस्थित राहावे, असे आवाहन प्रभाग क्रमांक १६ अथवा १७ चे भाजप इच्छुक उमेदवार ॲड. दिलीप ठाकूर यांनी केले आहे.