नांदेड प्रतिनिधी दि.०६:- दि. २१ व २२ फेब्रुवारी रोजी कुबेरनगरी मौजे लोंढेसांगवी प्रस्तुत नरेंद्र–देवेंद्र महोत्सव आयोजित करण्यात आला असून, यावर्षी या महोत्सवात पहिल्यांदाच महिलांसाठी ‘होम मिनिस्टर’ हा खास कार्यक्रम ठेवण्यात आला आहे. या कार्यक्रमांतर्गत विविध मनोरंजक खेळांमधून विजेत्या पाच महिलांना ‘लालपोतू कलेक्शन’तर्फे पैठणी साडी, तर उपविजेत्या २० महिलांना ऑरगंज्या साडी देण्यात येणार असल्याची माहिती स्वागताध्यक्ष शिवप्रसाद राठी व संयोजक धर्मभूषण ॲड. दिलीप ठाकूर यांनी दिली.
नरेंद्र–देवेंद्र महोत्सवाच्या पहिल्या दिवशी मराठी हास्यदरबार कै. चंद्रभागा केरबाजी गंजेवार नगरी, नवा मोंढा मैदान, नांदेड येथे रंगणार असून, यामध्ये चला हवा येऊ द्या फेम मिमिक्री किंग सतीश कासेवार यांचा बहुचर्चित ‘होम मिनिस्टर’ कार्यक्रम होणार आहे. सर्वसाधारणपणे या कार्यक्रमात एकच पैठणी पारितोषिक दिले जाते; मात्र नांदेडमध्ये पहिल्यांदाच पाच पैठणी व वीस ऑरगंज्या साड्या पारितोषिक स्वरूपात देण्यात येणार आहेत.
‘होम मिनिस्टर’ कार्यक्रमात महिलांशी संवाद साधत विविध मनोरंजक खेळ घेतले जातात. महिलांची कल्पकता, कौशल्य आणि आत्मविश्वास यांना या मंचावर व्यासपीठ मिळते. उखाणे, विनोदी संवाद आणि हास्याचे क्षण उपस्थितांचे भरपूर मनोरंजन करतात. तळ्यात–मळ्यात सारख्या खेळांमधून महिलांची चपळता तपासली जाते, तर संगीतावर आधारित गाणे ओळखा हा खेळ सर्वांच्याच विशेष पसंतीस उतरतो. विनोदी उखाणे सादर करणाऱ्या सौभाग्यवतींना विशेष पारितोषिकेही दिली जाणार आहेत. या कार्यक्रमामुळे महिलांच्या आयुष्यात उत्सवाचा आनंद अधिकच द्विगुणित होतो.
याशिवाय, महोत्सवात वेळेवर उपस्थित राहणाऱ्या दहा रसिकांना भाजपा कामगार आघाडी जिल्हाध्यक्ष सुरेश लोट यांच्यातर्फे दहा कलर टीव्ही भेट दिले जाणार आहेत. त्यामुळे महिलांनाही कलर टीव्ही जिंकण्याची संधी मिळणार आहे. या महोत्सवात देशातील नामवंत हास्यकवी व हास्यकलाकार सादरीकरण करणार असल्याने, तब्बल पाच तासांचा कार्यक्रम कसा संपतो हे रसिकांना कळतही नाही.
शनिवार दि. २१ फेब्रुवारी रोजी पहिल्या दिवशी चौदावा मराठी हास्य दरबार भरविण्यात येणार आहे. या हास्य दरबारात स्टँडअप कॉमेडीचे बादशहा बंडा जोशी, झी हास्य सम्राट सिद्धार्थ खिल्लारे तसेच लोकप्रिय शाहीर रमेश गिरी हे आपल्या विनोदी सादरीकरणातून रसिकांचे भरभरून मनोरंजन करणार आहेत.याच दिवशी रमेश पारसेवार, अॅड. गजानन पिंपरखेडे, रत्नाकर वाघमारे व गंगाप्रसाद तोष्णीवाल यांना नांदेड भूषण पुरस्कार देऊन सन्मानित करण्यात येणार आहे. तर सुधाकर पत्रभूषण पुरस्कार प्राप्त मान्यवरांमध्ये पन्नालाल शर्मा, अभय कुळकजाईकर, चारुदत्त चौधरी, संतोष पांडागळे व रामेश्वर काकडे यांचा समावेश आहे.
रविवार दि. २२ फेब्रुवारी रोजी महोत्सवाच्या दुसऱ्या दिवशी चोवीसावे अखिल भारतीय विराट कविसंमेलन आयोजित करण्यात आले आहे. या कविसंमेलनात मेरठ (उत्तर प्रदेश) येथील हास्य संचालक व क्रांती कवी सौरभ जैन सुमन, जबलपूर (मध्य प्रदेश) येथील हास्य गीतकार सुदीप भोला, भिलवाडा (राजस्थान) येथील हास्य व्यंग्य कवी दीपक पारेख, मैनपुरी (उत्तर प्रदेश) येथील वीर रस कवी डॉ. मनोज चौहान, सुरत (गुजरात) येथील शृंगार रसाच्या कवयित्री सोनल जैन तसेच दिल्लीच्या वीर रस कवयित्री नेहा शर्मा ‘नमन’ यांचा सहभाग असणार आहे. याच कार्यक्रमात माजी मुख्यमंत्री अशोकराव चव्हाण यांना नांदेड भूषण पुरस्काराने गौरविण्यात येणार आहे.
नांदेडमध्ये पहिल्यांदाच भव्य स्वरूपात होणाऱ्या या ‘होम मिनिस्टर’ कार्यक्रमाला महिलांनी व मुलींनी उत्स्फूर्त प्रतिसाद दिल्यास, दरवर्षी नरेंद्र–देवेंद्र महोत्सवात हा कार्यक्रम नियमितपणे समाविष्ट केला जाईल, अशी माहिती भाजपा प्रदेश कार्यकारणी सदस्य शिवप्रसाद राठी व भाजपा जिल्हा सरचिटणीस ॲड. दिलीप ठाकूर यांनी दिली आहे.