कासार सिरसीत मान्सूनपूर्व स्वच्छता मोहीम राबवण्याची नागरिकांची मागणी.
कासार सिरसी प्रतिनिधी : पावसाळा सुरू होण्यापूर्वी शहरातील रस्ते, तुंबलेल्या नाल्या व गटारांची तातडीने स्वच्छता करून मान्सूनपूर्व तयारी युद्धपातळीवर करण्यात यावी, अशी मागणी नागरिकांकडून होत आहे. पावसाळ्यात साथीचे आजार पसरण्याचा धोका लक्षात घेता प्रशासनाने त्वरित उपाययोजना कराव्यात, असे शहरवासीयांचे म्हणणे आहे.
यंदाच्या उन्हाळ्यात शहरातील अनेक नागरिकांनी जुनी घरे पाडून नवीन बांधकामांना सुरुवात केली आहे. त्यामुळे अनेक ठिकाणी बांधकाम साहित्य व मलब्यामुळे नाल्या तुंबल्या असून सांडपाणी रस्त्यावर वाहत आहे. तसेच शुद्ध पाणीपुरवठा योजनेच्या जलवाहिन्यांमध्ये सातत्याने बिघाड होत असल्याने अनेक ठिकाणी पाइप फुटून मोठ्या प्रमाणात पाणी रस्त्यावर वाहत आहे. यामुळे नागरिकांना मोठ्या अडचणींचा सामना करावा लागत आहे.
जलवाहिन्यांच्या दुरुस्ती व खोदकामामुळे शहरातील अनेक अंतर्गत रस्त्यांची दुरवस्था झाली असून सर्वत्र खड्डे पडले आहेत. त्यामुळे वाहतुकीला अडथळा निर्माण होत असून अपघाताची शक्यता वाढली आहे. शहरात ठिकठिकाणी घाणीचे साम्राज्य पसरल्याने नागरिकांच्या आरोग्याचा प्रश्न गंभीर बनला आहे.
पावसाळ्यापूर्वी प्रशासनाने तुंबलेल्या नाल्यांची साफसफाई, रस्त्यांची दुरुस्ती आणि स्वच्छता मोहीम राबवून शहरवासीयांना दिलासा द्यावा, अशी जोरदार मागणी नागरिकांकडून करण्यात येत आहे.