एचएससी व्होकेशनल विभाग बंद; सात कर्मचाऱ्यांची कार्यमुक्तीसाठी भटकंती.
कासार शिरसी, प्रतिनिधी : कासार शिरसी येथील श्री करी बसवेश्वर विद्यालयातील एचएससी (एमसीव्हीसी) व्होकेशनल विभाग शासनाने चालू शैक्षणिक वर्षापासून बंद केला आहे. या विभागातील सात कर्मचाऱ्यांना कार्यमुक्त करून समायोजन करण्याचे शिक्षण विभागाचे आदेश असतानाही अद्याप त्यांची कार्यमुक्ती न झाल्याने संबंधित कर्मचाऱ्यांचा पगार बंद झाला असून त्यांना आर्थिक अडचणींचा सामना करावा लागत आहे.
मिळालेल्या माहितीनुसार, विद्यालयातील व्होकेशनल विभागात अनेक वर्षांपासून सुसज्ज इमारत, स्वतंत्र प्रयोगशाळा, सुलभ शौचालय, स्वतःची जमीन तसेच विद्यार्थ्यांची कमी उपस्थिती यांसारख्या विविध त्रुटी होत्या. याबाबत वरिष्ठ कार्यालयाकडे पुराव्यानिशी तक्रारी करण्यात आल्या होत्या. त्यानंतर विभागामार्फत तीन वेळा चौकशी करण्यात आली. चौकशीअंती आवश्यक सुविधा ९० दिवसांत पूर्ण करण्याचे आदेश मुख्याध्यापकांना देण्यात आले होते. मात्र, या आदेशांची पूर्तता न झाल्याने शासनाने संबंधित विभाग बंद करण्याचा निर्णय घेतला.
विभाग बंद झाल्यानंतर सात कर्मचाऱ्यांचे समायोजन करून त्यांना कार्यमुक्त करण्याचे निर्देश प्रशासनाने दिले आहेत. मात्र, मुख्याध्यापक सौ. सविता मुरूमकर यांनी अद्याप कार्यमुक्ती न दिल्याने कर्मचाऱ्यांचे वेतन थांबले आहे. परिणामी कर्जाचे हप्ते, घरखर्च आणि इतर आर्थिक जबाबदाऱ्या सांभाळणे कठीण झाले असल्याचे कर्मचाऱ्यांचे म्हणणे आहे.
दरम्यान, कार्यमुक्ती मिळावी यासाठी संबंधित कर्मचाऱ्यांनी जिल्हा शिक्षणाधिकारी, लातूर यांच्यासह विविध प्रशासकीय अधिकाऱ्यांकडे लेखी निवेदने सादर केली आहेत. तसेच विद्यालयातील इयत्ता अकरावी उत्तीर्ण विद्यार्थ्यांना शाळा सोडल्याचे प्रमाणपत्र मिळण्यास विलंब होत असल्याच्या तक्रारीही पालकांकडून करण्यात येत आहेत. संबंधित कर्मचाऱ्यांना तातडीने कार्यमुक्ती देऊन त्यांचे समायोजन करावे, अशी मागणी कर्मचाऱ्यांनी प्रशासनाकडे केली आहे.
