नांदेड प्रतरीनिधी : सोनखेड पोलीस ठाणे हद्दीत अल्पवयीन मुलीवरील अत्याचाराच्या प्रकरणातील फरार आरोपीला नांदेड स्थानिक गुन्हे शाखेच्या पथकाने अवघ्या २४ तासांत अटक केली. पोलिसांच्या माहितीनुसार, २४ ऑगस्ट रोजी सायंकाळी अल्पवयीन मुलगी घरासमोर खेळत असताना आरोपीने चॉकलेटचे आमिष दाखवून तिला सोबत नेले. काही वेळाने मुलगी रडत घरी परतल्यानंतर कुटुंबीयांनी सोनखेड पोलीस ठाण्यात तक्रार दाखल केली.
प्रकरणाचे गांभीर्य लक्षात घेऊन पोलीस अधीक्षक डॉ. नीलाभ रोहन यांच्या आदेशाने स्थानिक गुन्हे शाखेची पथके आरोपीच्या शोधासाठी रवाना करण्यात आली. सोनखेड, लोहा, माळाकोळी, कंधार, अहमदपूर आदी परिसरात शोध घेतल्यानंतर मिळालेल्या गुप्त माहिती व तांत्रिक तपासाच्या आधारे आरोपी पालम, जिल्हा परभणी येथे लपल्याची माहिती मिळाली. त्यानुसार २५ ऑगस्ट रोजी शिरसकर स्मशानभूमी परिसरातील झुडपांमध्ये लपलेल्या विलास पंडित वाघमारे (वय ३०) याला पोलिसांनी ताब्यात घेतले.
आरोपीला पुढील कायदेशीर कारवाईसाठी सोनखेड पोलिसांच्या ताब्यात देण्यात आले असून, भारतीय न्याय संहिता व पॉक्सो कायद्यानुसार गुन्हा दाखल करण्यात आला आहे. ही कारवाई अपर पोलीस अधीक्षक अर्चना पाटील, अपर पोलीस अधीक्षक सूरज गुरव यांच्या मार्गदर्शनाखाली स्थानिक गुन्हे शाखेचे पोलीस निरीक्षक अतुल भोसले, त्यांच्या पथकाने तसेच सायबर सेलच्या पथकाने केली.