समाजसेवा कृतज्ञता सन्मानाने ॲड. दिलीप ठाकूर यांचा गौरव; पुरस्कारांची संख्या ११६.
नांदेड प्रतिनिधी : समाजातील गरजू, वंचित आणि दुर्बल घटकांसाठी सातत्याने विविध समाजोपयोगी उपक्रम राबवून सामाजिक बांधिलकी जपणारे धर्मभूषण ॲड. दिलीप ठाकूर यांच्या समाजसेवेची पुन्हा एकदा दखल घेण्यात आली. नांदेड येथील नियोजन भवनात मंगळवारी नांदेड परिक्षेत्राचे पोलीस उपमहानिरीक्षक शहाजी उमाप व ज्येष्ठ साहित्यिक व्यंकटेश चौधरी यांच्या हस्ते त्यांना ‘समाजसेवा कृतज्ञता सन्मान’ प्रदान करण्यात आला. ॲड. ठाकूर यांच्या वतीने हा पुरस्कार त्यांचे छोटे बंधू राजेशसिंह ठाकूर यांनी स्वीकारला. या सन्मानामुळे त्यांच्या पुरस्कारांची संख्या ११६ झाली आहे.
कार्यक्रमाच्या अध्यक्षस्थानी ‘एकमत’चे व्यवस्थापकीय संपादक मंगेश देशपांडे-डोंगरेजकर होते. प्रमुख अतिथी म्हणून निवासी उपजिल्हाधिकारी किरण आंबेकर, महापालिका आयुक्त डॉ. महेशकुमार डोईफोडे, जिल्हा परिषदेचे मुख्य कार्यकारी अधिकारी तथा प्रशासक महेश पाटील, लाचलुचपत प्रतिबंधक विभागाचे पोलीस अधीक्षक श्रीकृष्ण कोकाटे, शासकीय वैद्यकीय महाविद्यालयाचे अधिष्ठाता डॉ. सुधीर देशमुख, शिवालय महिला उद्योगाच्या अध्यक्षा संध्याताई बालाजीराव कल्याणकर यांच्यासह विविध क्षेत्रांतील मान्यवर उपस्थित होते.
कार्यक्रमाच्या प्रारंभी लोकनेते विलासराव देशमुख यांच्या प्रतिमेस पुष्प अर्पण करून अभिवादन करण्यात आले. त्यानंतर दीपप्रज्वलनाने कार्यक्रमाचे उद्घाटन झाले. ‘एकमत’चे आवृत्ती प्रमुख चारुदत्त चौधरी यांनी प्रास्ताविक केले.
वर्षभरात ९० समाजोपयोगी उपक्रम
ॲड. दिलीप ठाकूर गेल्या अनेक वर्षांपासून सामाजिक, शैक्षणिक, आरोग्यविषयक आणि सांस्कृतिक क्षेत्रात सातत्याने कार्यरत आहेत. वर्षभरात सुमारे ९० विविध समाजोपयोगी उपक्रम राबवून गरजूंच्या अडचणीच्या काळात मदतीचा हात देणे, हे त्यांच्या कार्याचे वैशिष्ट्य आहे. त्यांच्या सामाजिक कार्याची दखल घेत विविध संस्था, संघटना आणि मान्यवरांकडून यापूर्वीही त्यांचा गौरव करण्यात आला आहे.
११६ पुरस्कारांचा टप्पा
‘समाजसेवा कृतज्ञता सन्मान’ हा ॲड. दिलीप ठाकूर यांच्या पुरस्कारमालिकेतील ११६ वा पुरस्कार ठरला आहे. हा टप्पा त्यांच्या सामाजिक कार्याला मिळालेली मान्यता मानला जात आहे. पुरस्कारांची संख्या वाढत असली तरी प्रत्येक सन्मानामागे समाजासाठी केलेल्या कार्याची आणि गरजू व्यक्तींना दिलेल्या मदतीची स्वतंत्र कहाणी आहे.
‘एकमत’ने केलेला हा सन्मान समाजसेवेला समर्पित त्यांच्या अखंड प्रवासाला मिळालेली दाद असल्याचे मान्यवरांनी नमूद केले. पुढेही अधिक व्यापक सामाजिक बांधिलकीने समाजसेवेचा प्रवास सुरू ठेवणार असल्याची भावना ॲड. दिलीप ठाकूर यांनी व्यक्त केली.
कार्यक्रमाचे सूत्रसंचालन सुनील कांबळे यांनी केले, तर आभार जिल्हा प्रतिनिधी सुनील पारडे यांनी मानले. कार्यक्रमास नागरिक, पत्रकार, सामाजिक कार्यकर्ते आणि विविध क्षेत्रांतील मान्यवर मोठ्या संख्येने उपस्थित होते.