शहरातील आरोग्य केंद्रांची माहिती देणारे माहितीपत्रक नागरिकांसाठी उपलब्ध.
देगलूर प्रतिनिधी : तीन राज्यांच्या सीमेवर वसलेले देगलूर शहर परिसरातील नागरिकांसाठी महत्त्वाचे केंद्र आहे. मात्र, गंभीर आजारांवरील उपचारांसाठी या भागातील अनेक रुग्णांना हैदराबाद, बीदर, नांदेड यांसारख्या शहरांकडे जावे लागते. देगलूरमध्ये उपलब्ध असलेल्या आरोग्य सुविधांची माहिती नागरिकांना सहज उपलब्ध व्हावी, तसेच शासनाच्या मोफत आरोग्य सेवांचा अधिकाधिक लाभ मिळावा, या उद्देशाने आरोग्य सभापती सौ. रत्नमाला कौरवार यांच्या पुढाकारातून शहरातील आरोग्य केंद्रांची माहिती देणारे माहितीपत्रक (Pamphlet) तयार करण्यात आले आहे.
‘निरोगी देगलूर, स्वस्थ देगलूर!’ या संकल्पनेअंतर्गत तयार करण्यात आलेल्या या माहितीपत्रकाचे अनावरण आमदार मा. प्रतापराव पाटील चिखलीकर यांच्या शुभहस्ते करण्यात आले. आरोग्य सभापती म्हणून सौ. रत्नमाला कौरवार यांनी नागरिकांच्या आरोग्याच्या दृष्टीने केलेला हा प्रयत्न महत्त्वपूर्ण असून, शहरातील नागरिकांना आपल्या परिसरातील उपलब्ध आरोग्य सुविधांची माहिती एका ठिकाणी मिळण्यास मदत होणार आहे.
देगलूर नगर परिषद अंतर्गत उपलब्ध आरोग्य केंद्रे
- नागरी आरोग्य वर्धिनी केंद्र क्र. १ – खाजाबाबा नगर
- नागरी आरोग्य वर्धिनी केंद्र क्र. २ – रामपूर रोड
- नागरी आरोग्य वर्धिनी केंद्र क्र. ३ – नरंगल रोड
- नागरी आरोग्य वर्धिनी केंद्र क्र. ४ – आनंद नगर
- नागरी प्राथमिक आरोग्य केंद्र – जुनी नगर पालिका, पोलीस स्टेशनजवळ
- हिंदू हृदयसम्राट बाळासाहेब ठाकरे आपला दवाखाना – सरकारी गोदामाजवळ
विविध आरोग्य सुविधा मोफत उपलब्ध
या आरोग्य केंद्रांमध्ये बाह्यरुग्ण विभाग (OPD), माता व बालसंगोपन सेवा, कुटुंब कल्याण सल्ला, लसीकरण, रक्त तपासणीसह विविध लॅब टेस्ट, किशोरवयीन समुपदेशन, पोषण आहार मार्गदर्शन तसेच रक्तदाब, मधुमेह व कर्करोग तपासणी व उपचाराच्या सुविधा उपलब्ध आहेत.
याशिवाय क्षयरोग, कुष्ठरोग आणि हत्तीरोगाचे निदान व उपचारही उपलब्ध करून देण्यात येत आहेत. सर्व तपासण्या व औषधे पूर्णपणे मोफत असल्याची माहिती या पत्रकाद्वारे नागरिकांना देण्यात आली आहे.
सर्वसाधारण आरोग्य केंद्रांची वेळ सकाळी ९ ते सायंकाळी ५ वाजेपर्यंत, तर ‘आपला दवाखाना’ची वेळ दुपारी २ ते रात्री १० वाजेपर्यंत असल्याचे माहितीपत्रकात नमूद करण्यात आले आहे.
देगलूर शहरातील नागरिक व रुग्णांनी या शासकीय आरोग्य सुविधांची माहिती घेऊन उपलब्ध सेवांचा लाभ घ्यावा, हा या उपक्रमामागील प्रमुख उद्देश आहे.