सायंकाळी ५ ते रात्री ९ वाजेपर्यंत वीजपुरवठा खंडित; महिला भाविकांची गैरसोय, नागरिकांतून तीव्र नाराजी.
कासार शिरशी प्रतिनिधी : नवरात्रोत्सवाच्या पावन पर्वात कासार शिरशी शहरासह परिसरात वीज वितरण कंपनीच्या अनियमित वीजपुरवठ्यामुळे नागरिकांना मोठ्या अडचणींचा सामना करावा लागत आहे. घटस्थापनेपासून दररोज सायंकाळी ५ ते रात्री ९ वाजेपर्यंत वीजपुरवठा खंडित होत असल्याने नवरात्रोत्सवाच्या उत्साहावर विरजण पडत आहे. देवीच्या दर्शनासाठी आणि आकर्षक सजावट पाहण्यासाठी बाहेर पडणाऱ्या महिला भाविकांना अंधारातून मार्ग काढावा लागत असून, ऐन आरतीच्या वेळी वीज गायब होत असल्याने भाविकांमध्ये तीव्र नाराजी व्यक्त होत आहे.
ऐन सणासुदीच्या काळात वीजपुरवठा खंडित
कासार शिरशी शहरात गेल्या काही दिवसांपासून दिवसा आणि रात्री वारंवार वीजपुरवठा खंडित होत असल्याने नागरिक त्रस्त झाले आहेत. सध्या नवरात्रोत्सव सुरू असून शहरातील विविध ठिकाणी देवीच्या मूर्तींची स्थापना करून आकर्षक विद्युत रोषणाई आणि सजावट करण्यात आली आहे. देवीचे दर्शन घेण्यासाठी तसेच सजावट पाहण्यासाठी महिला आणि भाविकांची मोठी गर्दी होत आहे. मात्र, नेमक्या याच वेळी वीजपुरवठा बंद राहत असल्याने भाविकांची गैरसोय होत आहे.
नवरात्रोत्सवासारख्या महत्त्वाच्या धार्मिक सणाच्या काळात अखंड वीजपुरवठा अपेक्षित असताना दररोज चार तास वीज बंद राहत असल्याने नागरिकांकडून नाराजी व्यक्त केली जात आहे. वीज वितरण कंपनीने नवरात्रोत्सवाच्या आनंदावर जणू काळी झालर चढवली असल्याची भावना नागरिकांतून व्यक्त होत आहे.
अंधारामुळे महिलांच्या सुरक्षिततेचा प्रश्न
शहरातील अनेक भागांत पथदिवेही बंद असल्याने रात्रीच्या वेळी अंधाराचे साम्राज्य पसरत आहे. अशा परिस्थितीत देवीच्या दर्शनासाठी बाहेर पडणाऱ्या महिलांच्या अंगावरील दागिने चोरीला जाण्याची भीती नागरिक व्यक्त करीत आहेत. गर्दीच्या ठिकाणी अंधाराचा फायदा घेऊन अनुचित प्रकार घडण्याची शक्यताही नाकारता येत नाही.
त्यामुळे नवरात्रोत्सवाच्या कालावधीत शहरातील प्रमुख चौक, देवी मंडळांच्या परिसरात आणि गर्दीच्या ठिकाणी पोलिसांनी नियमित गस्त घालावी, अशी मागणी नागरिकांकडून करण्यात येत आहे. तसेच बंद पडलेले पथदिवे तातडीने सुरू करून शहरातील प्रकाशव्यवस्था सुरळीत करावी, अशी अपेक्षा व्यक्त केली जात आहे.
पवन आणि सौरऊर्जेची वीज जाते कुठे?
वीजसाठ्यातील कमतरतेमुळे वीज निर्मिती घटत असल्याचे वीज वितरण कंपनीकडून सांगण्यात येत असल्याचे नागरिकांचे म्हणणे आहे. मात्र, पवनऊर्जा आणि सौरऊर्जेद्वारे निर्माण होणाऱ्या विजेचा पुरवठा आणि त्याचे नियोजन नेमके कसे केले जाते, असा संतप्त सवाल नागरिकांकडून उपस्थित केला जात आहे.
सणासुदीच्या काळात नागरिकांना नियमित वीजपुरवठा मिळावा, यासाठी संबंधित विभागाने योग्य नियोजन करणे आवश्यक असल्याचे मत व्यक्त होत आहे.
वीज वितरण कंपनीने तातडीने उपाययोजना कराव्यात
नवरात्रोत्सवाच्या उर्वरित दिवसांत तरी वीजपुरवठा सुरळीत ठेवावा, ऐन आरतीच्या वेळी वीज खंडित होणार नाही याची काळजी घ्यावी आणि शहरातील बंद पथदिवे तातडीने सुरू करावेत, अशी मागणी कासार शिरशी येथील नागरिकांकडून करण्यात येत आहे. धार्मिक उत्सवाच्या काळात नागरिकांची गैरसोय टाळण्यासाठी वीज वितरण कंपनी आणि संबंधित प्रशासनाने त्वरित लक्ष घालावे, अशी अपेक्षा व्यक्त होत आहे.