राष्ट्रीय संगीत नाटक अकादमीच्या अध्यक्षा डॉ. संध्या पुरेचा यांनी घेतली सांस्कृतिक कार्य मंत्री यांची भेट
मुंबई, दि. ०१ डिसेंबर :- “महाराष्ट्राला संगीत नाटकांची समृद्ध परंपरा लाभलेली असून, भविष्यातही संगीत नाटकांच्या वाटचालीसाठी शासन संगीत नाटक कलावंतांच्या पाठीशी राहील”, असा विश्वास सांस्कृतिक कार्य मंत्री सुधीर मुनगंटीवार यांनी व्यक्त केला.
राष्ट्रीय संगीत नाटक अकादमीच्या अध्यक्षा डॉ. संध्या पुरेचा यांनी सह्याद्री अतिथीगृह येथे सांस्कृतिक कार्य मंत्री सुधीर मुनगंटीवार यांची भेट घेतली, त्यावेळी ते बोलत होते. यावेळी बांबू निर्मित तिरंगा भेट देऊन डॉ.संध्या पुरेचा यांचा सांस्कृतिक मंत्री श्री. मुनगंटीवार यांनी सत्कार केला.
“राष्ट्रीय संगीत नाटक अकादमी ही देशातील एक प्रतिष्ठित संस्था आहे. संगीत तसेच नाटक क्षेत्रासाठी अकादमीकडून देण्यात येणाऱ्या गेल्या तीन वर्षातील पुरस्कारांची अलिकडेच घोषणा झाली आहे. महाराष्ट्रातील तब्बल १७ कलावंतांना हे मानाचे पुरस्कार घोषित झाले आहेत, ही अतिशय गौरवास्पद बाब असल्याचेही सांस्कृतिक कार्य मंत्री सुधीर मुनगंटीवार यांनी सांगितले. तसेच पुरस्कार विजेत्यांचे त्यांनी अभिनंदन केले.
यावेळी अकादमीचे कार्यकारी सदस्य डॉ. विद्याधर व्यास, डॉ. उमा डोगरा, डॉ. प्रकाश खांडगे उपस्थित होते.
