नांदेड प्रतिनिधी,दि.०८:- भ्रमिस्टांना रंग लावून त्यांना होळी खेळण्याच्या आनंद देत
२६ व्या महिन्यात धर्मभूषण ॲड. दिलीप ठाकूर यांनी ३६ भ्रमिस्टांची कटिंग दाढी करून गरम पाण्याने अंघोळ घातल्यानंतर स्वेटरसह नवीन कपडे व शंभर रुपयाची बक्षिसी देऊन कायापालट केला असून समाजातील अंतिम घटकसोबत होळी साजरी केल्यामुळे सर्व स्तरातून कौतुक करण्यात येत आहे.
दर महिन्याच्या पहिल्या सोमवारी भाजपा नांदेड महानगर, लायन्स क्लब नांदेड सेंट्रल, अमरनाथ यात्री संघ यांच्या संयुक्त विद्यमाने नांदेड येथे कायापालट उपक्रम नियमित सुरू आहे. आज योगायोगाने होळी असल्यामुळे वेगळ्या प्रकारे उपक्रम साजरा करण्यात आला. अरुणकुमार काबरा, कामाजी सरोदे, महेश शिंदे, संजयकुमार गायकवाड यांनी शहरातील विविध भागातून स्वतःच्या दुचाकी वर भ्रमिष्ट, कचरा वेचणारे, अपंग, बेघर नागरिकांना बसून आणले.
स्वयंसेवक बालाजी खोडके यांनी सर्वांची काळजीपूर्वक कटिंग दाढी केली. बालाजी मंदिराचे महंत कैलास महाराज वैष्णव यांच्या सहकार्याने गरम पाण्याने स्नान करण्याची व्यवस्था करण्यात आली.
कित्येक दिवस आंघोळ न करणाऱ्या या नागरिकांना महेंद्र शिंदे व रामशरण चौधरी यांनी साबण लावून स्नान घातले.आधी होळीचा आनंद आणि त्यानंतर य अंडरपॅन्ट, बनियन व पॅन्ट शर्ट मिळाल्यामुळे सर्वजण खुश झाले. ही भ्रमिष्ट मंडळी कायापालट होण्यासाठी तयार व्हावे म्हणून शंभर रुपयाची बक्षिसी व चहा फराळाची व्यवस्था करण्यात येते.पूर्वीचे मळके कपडे, अवास्तव वाढलेले केस आणि नंतरची चकाचक करण्यात आलेली कटिंग दाढी व नवीन कपडे घातल्यामुळे उपेक्षितांचा झालेला कायापालट पाहून त्यांना स्वतःला नवल वाटले.
हा अनोखा उपक्रम पाहण्यासाठी अनेक नागरिकांनी सदिच्छा भेट दिली.दर महिन्याच्या पहिल्या सोमवारी कायापालट हा उपक्रम राबविण्यात येणार असल्यामुळे अशा बेघर व्यक्ती आढळल्यास त्याची माहिती द्यावी असे आवाहन संयोजक दिलीप ठाकूर यांनी केले आहे.
