एचएसआरपी नंबर प्लेट वेळेत बसवा – दंड टाळा

नंबर प्लेट बसविण्याची अंतिम मुदत – ३० नोव्हेंबर २०२५

नांदेड, दि. २४ सप्टेंबर :- जिल्ह्यात १ एप्रिल २०१९ पूर्वी नोंदणी झालेल्या सर्व वाहनांना हाय सिक्युरिटी रजिस्ट्रेशन नंबर प्लेट (HSRP) बसविणे बंधनकारक करण्यात आले आहे. या वाहन धारकांनी https://mhhsrp.com या संकेतस्थळावर जाऊन ऑनलाईन पद्धतीने शुल्क भरून ३० नोव्हेंबर २०२५ पर्यंत एचएसआरपी नंबर प्लेट बसवून घ्यावी, असे आवाहन सहाय्यक प्रादेशिक परिवहन अधिकारी, नांदेड यांनी केले आहे.

एचएसआरपी नसलेल्या वाहनांचे हस्तांतरण, पुनःनोंदणी, वित्तदात्यांची नोंदणी वा बोजा उतरविणे अशा कोणत्याही प्रक्रिया होऊ शकणार नाहीत. मोटार वाहन कायद्यानुसार मुदतीत HSRP बसविणे बंधनकारक असून अन्यथा दंडाला सामोरे जावे लागेल.

केंद्रीय मोटार वाहन नियम १९८९ च्या नियम ५० नुसार ही तरतूद आहे. १ एप्रिल २०१९ पासून उत्पादित होणाऱ्या सर्व वाहनांवर HSRP बसविणे बंधनकारक करण्यात आले असून जुनी वाहने लवकरात लवकर यामध्ये सामील करावीत, असे निर्देश देण्यात आले आहेत.

एचएसआरपीमुळे नंबर प्लेटमध्ये छेडछाड, बनावटगिरी रोखणे, वाहनांची ओळख पटविणे, तसेच राष्ट्रीय सुरक्षा सुनिश्चित करणे शक्य होणार आहे. सर्वोच्च न्यायालयाच्या आदेशानुसार हे पाऊल उचलण्यात आले असून महाराष्ट्रात मे. रोजमर्टा सेफ्टी सिस्टम्स लि. या कंपनीला उत्पादनाची जबाबदारी देण्यात आली आहे.

शुल्क संरचना :

• मोटारसायकल / ट्रॅक्टर : ₹४५० (+ जीएसटी)

• तीनचाकी : ₹५०० (+ जीएसटी)

• चारचाकी : ₹७४५ (+ जीएसटी)

हे शुल्क ऑनलाईन भरावे लागणार असून, फिटमेंट सेंटरकडून जादा शुल्क आकारले गेल्यास तक्रार करता येईल.