दिलीप ठाकूर यांच्या कल्पकतेला अमर राजूरकर यांचे दाद; विजेत्यांचा सत्कार.
नांदेड प्रतिनिधी, दि.२४ :- नांदेड वाघाळा शहर महानगरपालिकेच्या निवडणुकीच्या पार्श्वभूमीवर आयोजित करण्यात आलेल्या “कौन बनेगा नगरसेवक” व “कौन बनेगा नांदेड का प्रशांत किशोर” या अभिनव स्पर्धांमधील शितल खांडील यांच्यासह २० विजेत्यांना भाजपा महानगराध्यक्ष अमरनाथ राजूरकर यांच्या हस्ते आकर्षक पारितोषिकांचे वितरण करण्यात आले. धर्मभूषण अॅड. दिलीप ठाकूर यांच्या संकल्पनेतून साकारलेल्या या उपक्रमांना नागरिकांचा उत्स्फूर्त प्रतिसाद लाभला.
महानगरपालिकेच्या निवडणुकीत विविध प्रभागांतून एकूण ८१ नगरसेवक निवडून आले. “कौन बनेगा नगरसेवक” या स्पर्धेत शेकडो मतदारांनी सहभाग घेतला. एसएमएसद्वारे एकूण १८०९ प्रवेशिका प्राप्त झाल्या, त्यापैकी १४८ जणांचे अंदाज अचूक ठरले. मात्र पारितोषिकांसाठी केवळ २० विजेत्यांची निवड सोडतीद्वारे करण्यात आली.
या स्पर्धेतील विजेते पुढीलप्रमाणे –
धीरज स्वामी, गायत्री तपके, सतीश सुगनचंदजी शर्मा, दीपक यादव, सुवर्णा जहागीरदार, प्रसाद देशपांडे, रामजी भानुशाली, जयवंत सोमवाड, मनोहर समसते, चंद्रकांत द्रौपदीवार, ज्ञानेश्वर चापके, साईनाथ कासरालीकर, प्रणित लोहगावे, भीमराव जोंधळे, शुभम कुलकर्णी, आकाश राक्षसमारे, शे. उस्मान शे. रफिक, सिद्धार्थ हत्तीअंबीरे व मोहम्मद इस्माईल खाजाभाई.
भाजपा नांदेड महानगर व अमरनाथ यात्री संघाच्या वतीने या दोन्ही स्पर्धांचे मोफत आयोजन करण्यात आले होते. सट्टेबाजीला आळा बसावा व नागरिकांचा लोकशाही प्रक्रियेतील सहभाग वाढावा, या उद्देशाने दिलीप ठाकूर दरवेळी निवडणुका तसेच विश्वचषक क्रिकेट व फुटबॉल स्पर्धांच्या काळात असे उपक्रम राबवितात.
निकालाच्या दिवशी भाजपा मध्यवर्ती प्रचार कार्यालयात मोठ्या स्क्रीनवर निकाल दाखविण्याची व्यवस्था करण्यात आली होती. कार्यालय कार्यकर्ते व नागरिकांनी खचाखच भरले होते. त्याचवेळी सुचलेल्या कल्पनेतून “कौन बनेगा नांदेड का प्रशांत किशोर” ही स्पर्धा घेण्यात आली. या स्पर्धेत १८७ जणांनी सहभाग घेतला.
विविध पक्षांचे किती नगरसेवक निवडून येतील, याचा अचूक अंदाज बांधणे कठीण ठरले. मात्र ८० टक्के अचूक अंदाज नोंदविल्याबद्दल भाजपा महानगर सरचिटणीस शितल खांडील यांना “नांदेड का प्रशांत किशोर” हा सन्मान प्रदान करण्यात आला.
भाजपा महानगर कार्यालयात झालेल्या समारंभात विजेत्यांना अमरनाथ राजूरकर यांच्या हस्ते पारितोषिके देण्यात आली. यावेळी दिलीप ठाकूर यांनी स्पर्धा आयोजनामागील भूमिका स्पष्ट केली, तर अमरनाथ राजूरकर यांनी सर्व विजेत्यांचे अभिनंदन करून ठाकूर यांच्या कल्पकतेचे विशेष कौतुक केले.
ही स्पर्धा यशस्वी करण्यासाठी राजेशसिंह ठाकूर, गोविंद कन्नडकर, लक्ष्मण खिसे, सुरेश लोट, कामाजी सरोदे, सुरेश शर्मा, भोला धुमाळ, संतोष भारती, शिवा लोट, अरुणकुमार काबरा व सुरेश निल्लावार यांनी परिश्रम घेतले.