देगलूर प्रतिनिधी दि.३०:– घरातून कोणालाही न सांगता निघून गेलेल्या अल्पवयीन मुलीचा अवघ्या २४ तासांच्या आत शोध लावून देगलूर पोलिसांनी पुन्हा एकदा आपली तत्परता व कार्यक्षमतेची प्रचिती दिली आहे. संबंधित मुलीला सुरक्षितपणे शोधून तिच्या आईच्या ताब्यात सुपूर्द करण्यात आले.
गोकुळ नगर, देगलूर येथील एका महिलेने आपल्या मुलीला अज्ञात कारणास्तव घरातून निघून गेल्याची तक्रार देगलूर पोलीस ठाण्यात दिली होती. ही माहिती मिळताच पोलिसांनी तात्काळ शोधमोहीम हाती घेतली. सायबर सेल नांदेडच्या तांत्रिक मदतीने मुलीच्या हालचालींचा मागोवा घेण्यात आला.
पोलीस अधीक्षक मा. श्री. अविनाश कुमार, अपर पोलीस अधीक्षक मा. श्री. सुरज गुरव व उपविभागीय पोलीस अधिकारी मा. श्री. निलेश गोसावी यांच्या मार्गदर्शनाखाली पोलीस निरीक्षक श्री. मारोती श्रीराम मुंडे व त्यांच्या पथकाने विशेष प्रयत्न करत शोधकार्य सुरू ठेवले.
तपासादरम्यान मुलगी निमगव्हाण (ता. सोयगाव, जि. संभाजीनगर) परिसरात असल्याचे निष्पन्न झाले. पोलिसांनी तेथे जाऊन मुलीला ताब्यात घेतले. प्राथमिक चौकशीत ती मैत्रिणीकडे जाण्यासाठी घरातून निघाल्याचे समोर आले असून कोणतीही अनुचित घटना घडलेली नसल्याचे स्पष्ट झाले.
त्यानंतर मुलीला सुखरूपपणे तिच्या आईच्या ताब्यात देण्यात आले. पोलिसांच्या या उल्लेखनीय कामगिरीबद्दल वरिष्ठ अधिकाऱ्यांनी पथकाचे कौतुक केले आहे.