बीड प्रतिनिधी दि.०६ :- केज तालुक्यातील येवता येथील येवतेश्वर मंदिरात सुरू असलेल्या अखंड हरिनाम सप्ताह व श्री ग्रंथराज ज्ञानेश्वरी पारायण सोहळ्याला भाविकांचा उत्स्फूर्त प्रतिसाद मिळत आहे. ५ मार्चपासून सुरू झालेला हा धार्मिक सोहळा सध्या भक्तिमय वातावरणात सुरू असून दोन दिवसांपासून मंदिर परिसरात मोठ्या संख्येने भाविकांची उपस्थिती दिसून येत आहे.
या सप्ताहात दररोज पहाटे काकडा भजन, दिवसभर विष्णुसहस्रनाम पठण, श्री ग्रंथराज ज्ञानेश्वरी पारायण, गाथा भजन तसेच रात्री हरिकीर्तन असे विविध धार्मिक कार्यक्रम आयोजित करण्यात येत आहेत. या कार्यक्रमांमुळे संपूर्ण परिसर भक्तिरसात न्हाऊन निघाला आहे.
सप्ताहात विविध भागांतील कीर्तनकार व प्रवचनकार सहभागी होत असून भाविकांना आध्यात्मिक मार्गदर्शन लाभत आहे. या सोहळ्यात ह.भ.प. विष्णू महाराज सासुरेकर, ह.भ.प. बाबा महाराज कदम, ह.भ.प. महंत श्रीराम महाराज विडेकर, ह.भ.प. भगवान महाराज वरपांगकर, ह.भ.प. अशोक महाराज थोरात, ह.भ.प. प्रकाश महाराज साठे, ह.भ.प. कु. अंजलीताई जोगदंड, ह.भ.प. सतीष महाराज शास्त्री आदी कीर्तनकार उपस्थित राहणार आहेत.
या सप्ताहाची सांगता ह.भ.प. चांगदेव महाराज काकडे यांच्या काल्याच्या कीर्तनाने होणार असून त्यानंतर महाप्रसादाचे आयोजन करण्यात येणार आहे. येवतेश्वर मित्र मंडळ व समस्त गावकरी मंडळी, येवता (ता. केज, जि. बीड) यांच्या वतीने हा धार्मिक सोहळा आयोजित करण्यात आला असून भाविकांनी मोठ्या संख्येने सहभागी व्हावे, असे आवाहन आयोजकांनी केले आहे.