देगलूर प्रतिनिधी : तालुक्यातील हाळी येथील मूळ रहिवासी असलेले, परंतु शहरातील साधना नगर येथे वास्तव्य असणारे प्रतिष्ठित नागरिक तथा शिक्षण व सामाजिक क्षेत्रात उल्लेखनीय कार्य करणारे कै. उमेश बापुराव जाधव पाटील हाळीकर यांचे शनिवारी (दि. ७ मार्च २०२६) रोजी पहाटे पुणे येथे दीर्घ आजाराने निधन झाले. मृत्यूसमयी त्यांचे वय ६४ वर्षे होते. त्यांच्यावर रविवार दि. ८ मार्च रोजी सकाळी १० वाजता मौजे हाळी ता. देगलूर येथे अंतिम संस्कार करण्यात येणार आहेत. त्यांच्या निधनाने हाळी परिसरात शोककळा पसरली आहे.
कै. हाळीकर यांनी शिक्षण क्षेत्रात दीर्घकाळ कार्य करत साधना हायस्कूलमध्ये उपमुख्याध्यापक म्हणून जबाबदारी सांभाळली होती. विद्यार्थ्यांच्या सर्वांगीण विकासासाठी त्यांनी सातत्याने प्रयत्न केले. शिक्षणासोबतच सामाजिक कार्यातही त्यांचा सक्रिय सहभाग होता.
मराठा सेवा संघाच्या माध्यमातून त्यांनी समाजकार्याला चालना दिली. ग्रामीण भागातील विद्यार्थ्यांना दर्जेदार शिक्षण मिळावे या हेतूने त्यांनी महात्मा फुले इंग्रजी माध्यमिक शाळा सुरू करण्यासाठी पुढाकार घेतला. यामुळे अनेक विद्यार्थ्यांना शिक्षणाची संधी उपलब्ध झाली. बापू सेवाभावी संस्थेचे सचिव म्हणूनही त्यांनी अनेक उपक्रम राबवले होते. ते जिल्हा सरपंच संघटनेचे पदाधिकारी म्हणून कार्यरत होते जिल्हा ग्रंथालय संघटनेच्या चळवळीतही त्यांचे योगदान महत्त्वपूर्ण राहिलेले आहे .
हाळी गावाच्या विकासासाठी त्यांनी ग्रामपंचायतीच्या माध्यमातून तब्बल पंधरा वर्षे विविध कामे केली होती. त्यांच्या कार्यामुळे गावातील सामाजिक व विकासात्मक उपक्रमांना दिशा मिळाली. ते दीर्घकाळ काँग्रेस पक्षाचे कार्यकर्ते म्हणून कार्यरत होते.
त्यांच्या पश्चात आई, पत्नी, दोन मुले, एक मुलगी, चार नातवंडे, तसेच नांदेड येथील जाधव क्लासेसचे संचालक प्रा. रणजीत जाधव आणि प्रसिद्ध बालरोगतज्ञ डॉ. आनंद जाधव हाळीकर यांचे ते बंधू होत.
**त्यांच्या आत्म्यास शांती लाभो…
ॐ शांती… भावपूर्ण श्रद्धांजली..