नांदेड प्रतिनिधी : खडतर, साहसी आणि आध्यात्मिक दृष्ट्या अत्यंत महत्त्वपूर्ण मानली जाणारी अमरनाथ यात्रा यंदा पुन्हा एकदा भव्य स्वरूपात आयोजित करण्यात आली आहे. धर्मभूषण ॲड. दिलीप ठाकूर यांच्या नेतृत्वाखाली सलग २६ वर्षांचा यशस्वी व सुरक्षित अनुभव लाभलेल्या या यात्रेची २७ वी आवृत्ती ३ ते १५ जुलै दरम्यान पार पडणार आहे. दरवर्षीप्रमाणे यंदाही यात्रेला भाविकांचा उत्स्फूर्त प्रतिसाद मिळत असून, सध्या केवळ १० जागा शिल्लक असल्याने इच्छुकांनी त्वरित नोंदणी करण्याचे आवाहन करण्यात आले आहे.
हिंदू धर्मात अमरनाथ यात्रेला विशेष धार्मिक महत्त्व आहे. भगवान शंकराने माता पार्वतीला अमरत्वाचे रहस्य अमरनाथच्या पवित्र गुहेत सांगितल्याची पौराणिक श्रद्धा आहे. दरवर्षी ठराविक काळात नैसर्गिकरित्या तयार होणारे बर्फाचे शिवलिंग हे या यात्रेचे प्रमुख आकर्षण मानले जाते. त्यामुळे प्रत्येक हिंदूंनी आयुष्यात एकदा तरी ही यात्रा करावी, असा दृढ समज आहे. यंदाची अधिकृत यात्रा ३ जुलै ते २८ ऑगस्ट दरम्यान होणार असल्याची घोषणा जम्मू-काश्मीरचे उपराज्यपाल मनोज सिन्हा यांनी केली आहे.
या यात्रेसाठी १३ ते ७० वर्षे वयोगटातील सुदृढ व्यक्तींना सहभाग घेता येतो. यात्रेपूर्वी जिल्हा शल्य चिकित्सकांकडून वैद्यकीय फिटनेस प्रमाणपत्र घेणे अनिवार्य असून त्यानंतर पंजाब नॅशनल बँकेत प्रत्यक्ष उपस्थित राहून नोंदणी प्रक्रिया पूर्ण करावी लागते. सर्व प्रक्रिया पारदर्शक आणि नियमांनुसार पार पडते.
नांदेड येथून सुरू होणाऱ्या या यात्रेत धार्मिक व पर्यटन स्थळांचा समृद्ध अनुभव मिळणार आहे. यात्रेदरम्यान वैष्णोदेवी मंदिर दर्शन, अमृतसर येथील सुवर्ण मंदिर भेट, दिल्लीतील ऐतिहासिक स्थळे, जम्मू व श्रीनगरचे निसर्गसौंदर्य, सोनमर्ग व गुलमर्गचे रमणीय परिसर, खीर भवानी मंदिर तसेच अटारी बॉर्डरवरील बीटिंग रिट्रीट सोहळा अनुभवण्याची संधी मिळणार आहे.
यात्रेकरूंच्या सुरक्षिततेसाठी तसेच शारीरिक व मानसिक तयारीसाठी विशेष नियोजन करण्यात आले आहे. जिल्हाधिकारी कार्यालय, नांदेड येथील मैदानावर दररोज चालणे, प्राणायाम, योगाभ्यास आणि ओपन जिमद्वारे व्यायाम घेतला जात आहे. या शिस्तबद्ध तयारीमुळे गेल्या २६ वर्षांत एकही दुर्घटना घडलेली नसून, ही यात्रेची विश्वासार्हता अधोरेखित करणारी बाब आहे.
“ना नफा ना तोटा” या तत्त्वावर आयोजित या यात्रेत आणखी एक वैशिष्ट्य म्हणजे दिलीप ठाकूर यांच्या मित्रपरिवाराकडून सलग १३ दिवस मोफत व सुस्वादू भोजनाची व्यवस्था केली जाते. याशिवाय निवास, प्रवास, सुरक्षा व मार्गदर्शनासाठी अनुभवी स्वयंसेवक सतत सेवेत असतात.
ही यात्रा केवळ धार्मिक अनुभव देणारी नसून राष्ट्रीय एकात्मता, निसर्ग सौंदर्य आणि सामाजिक बंधुभाव यांचा संगम घडवणारी ठरते. त्यामुळे ही यात्रा आयुष्यभर लक्षात राहणारा प्रेरणादायी अनुभव ठरतो.
इच्छुक भाविकांनी लवकरात लवकर भाऊ ट्रॅव्हल्स, कला मंदिर समोर, नांदेड येथे संपर्क साधून आपली नोंदणी निश्चित करावी, असे आवाहन अमरनाथ यात्री संघाच्या वतीने करण्यात आले आहे.