24 जुन ला चालण्याच्या भव्य स्पर्धा :विजेत्यांना मिळणार 11 मोबाईल.
नांदेड प्रतिनिधी: सुदृढ, निरोगी आणि तंदुरुस्त भारत घडविण्याचे पंतप्रधान नरेंद्र मोदी यांचे स्वप्न साकार करण्याच्या उद्देशाने बुधवार, दि. २४ जून रोजी सकाळी ६ वाजता श्रीराम सेतू, गोवर्धनघाट, नांदेड येथे २७ व्या भव्य चालण्याच्या स्पर्धेचे आयोजन करण्यात आले आहे. या स्पर्धेत माध्यम प्रतिनिधींसह विविध अकरा गटांतील विजेत्यांना स्नेहलता जायस्वाल यांच्या तर्फे आकर्षक मोबाईल बक्षीस म्हणून देण्यात येणार असून, वेळेवर उपस्थित राहणाऱ्या पहिल्या २०० स्पर्धकांना आकर्षक टी-शर्ट देण्यात येणार असल्याची माहिती संयोजक धर्मभूषण ॲड. दिलीप ठाकूर यांनी दिली.
भाजपा महानगर नांदेड, लायन्स क्लब नांदेड सेंट्रल आणि अमरनाथ यात्री संघ यांच्या संयुक्त विद्यमाने आयोजित करण्यात येणारी ही स्पर्धा गेल्या अनेक वर्षांपासून नांदेडकरांच्या उत्स्फूर्त प्रतिसादामुळे एक लोकप्रिय आणि प्रेरणादायी उपक्रम बनली आहे. आरोग्य संवर्धन, नियमित व्यायामाची सवय आणि सामाजिक एकोपा वाढविण्याच्या उद्देशाने या स्पर्धेचे आयोजन करण्यात येते.
या स्पर्धेचे उद्घाटन महाराष्ट्राचे माजी मुख्यमंत्री तथा खासदार अशोकराव चव्हाण यांच्या हस्ते होणार आहे. कार्यक्रमास खासदार डॉ. अजित गोपछडे, भाजपा महानगराध्यक्ष तथा आमदार अमरनाथ राजूरकर, आमदार श्रीजया चव्हाण, भाजपा प्रदेश उपाध्यक्ष संजय कोडगे, ॲड. चैतन्य देशमुख, माजी पालकमंत्री डी. पी. सावंत, भाजपा जिल्हाध्यक्ष डॉ. संतुकराव हंबर्डे, ॲड. किशोर देशमुख, महापौर कविता मुळे, उपमहापौर दीपकसिंह रावत, स्थायी समिती सभापती विरेंद्रसिंह गाडीवाले, सभागृह नेते ॲड. महेश कनकदंडे, जिल्हा सरचिटणीस विजय येवणकर, शीतल खांडील, विजय गंभीरे, सुषमा थोरात तसेच लायन्स उपप्रांतपाल योगेश जायस्वाल यांच्यासह अनेक मान्यवर उपस्थित राहणार आहेत.
अमरनाथ यात्रेच्या पूर्वतयारीचा हा एक महत्त्वपूर्ण भाग आहे. यंदाची २७ वी अमरनाथ यात्रा दि. ३ जुलै रोजी तर २८ वी अमरनाथ यात्रा दि. १७ जुलै रोजी नांदेड येथून रवाना होणार आहे. समुद्रसपाटीपासून मोठ्या उंचीवर आणि अत्यंत प्रतिकूल हवामानात होणारी अमरनाथ यात्रा शारीरिकदृष्ट्या आव्हानात्मक मानली जाते. त्यामुळे यात्रेकरूंना तीन महिने आधीपासून नियमित चालणे, ओपन जिममधील व्यायाम, प्राणायाम, हास्ययोग आणि आरोग्यविषयक मार्गदर्शन दिले जाते.
दररोज सकाळी कलेक्टर कार्यालयाच्या मैदानावर यात्रेकरू एक तास चालण्याचा सराव करतात. त्याचबरोबर ओपन जिममध्ये व्यायाम आणि प्राणायामाद्वारे शारीरिक व मानसिक तंदुरुस्ती वाढविण्याचे काम केले जाते. या सर्व तयारीचा आढावा घेण्यासाठी आणि यात्रेकरूंची क्षमता तपासण्यासाठी या चालण्याच्या स्पर्धेचे आयोजन करण्यात आले आहे.
ही स्पर्धा केवळ अमरनाथ यात्रेकरूंसाठी नसून सर्वसामान्य नागरिकांसाठीदेखील खुली आहे. आजच्या धकाधकीच्या जीवनशैलीत वाढत चाललेल्या मधुमेह, रक्तदाब, हृदयरोग, स्थूलता आणि मानसिक तणाव यांसारख्या समस्यांवर नियमित चालणे हा अत्यंत प्रभावी उपाय मानला जातो. नागरिकांमध्ये चालण्याची सवय निर्माण व्हावी, आरोग्याबाबत जागरूकता वाढावी आणि निरोगी जीवनशैलीचा प्रसार व्हावा, हा या स्पर्धेमागील प्रमुख हेतू आहे.
चौकट
स्पर्धा पूर्णतः निशुल्क असून प्रत्येक स्पर्धकाला दोन किलोमीटर अंतर चालायचे आहे. स्पर्धेसाठी खालील अकरा गट निश्चित करण्यात आले आहेत :
• ४१ ते ६० वयोगटातील पुरुष
• ४१ ते ६० वयोगटातील महिला
• ६० वर्षांवरील पुरुष
• ६० वर्षांवरील महिला
• ४१ ते ६० वयोगटातील पुरुष अमरनाथ यात्री
• ४१ ते ६० वयोगटातील महिला अमरनाथ यात्री
• ६० वर्षांवरील पुरुष अमरनाथ यात्री
• ६० वर्षांवरील महिला अमरनाथ यात्री
• पुरुष खुला गट
• महिला खुला गट
• माध्यम प्रतिनिधी गट
प्रत्येक गटातील प्रथम क्रमांकाच्या विजेत्यास स्नेहलता जायस्वाल यांच्या तर्फे आकर्षक मोबाईल बक्षीस देण्यात येणार आहे. तसेच प्रत्येक गटातील प्रथम, द्वितीय आणि तृतीय क्रमांकाच्या विजेत्यांना मंगल कार्यालय व टेन्ट असोसिएशनचे जिल्हाध्यक्ष विजयसिंह परदेशी यांच्या तर्फे सुंदर स्मृतिचिन्हे प्रदान करण्यात येणार आहेत.
स्पर्धेसाठी नावनोंदणी स्पर्धेच्या दिवशी सकाळी ५.४५ वाजता स्पर्धास्थळी करण्यात येणार आहे. त्यामुळे इच्छुकांनी वेळेपूर्वी उपस्थित राहून नावनोंदणी करावी. तसेच पहिल्या २०० स्पर्धकांना आकर्षक टी-शर्ट देण्यात येणार असल्याने नागरिकांनी मोठ्या संख्येने सहभागी व्हावे, असे आवाहन आयोजकांनी केले आहे.
नांदेडकरांनी या आरोग्यदायी आणि प्रेरणादायी उपक्रमात सहभागी होऊन निरोगी जीवनशैलीचा संकल्प करावा, असे आवाहन भाजपा जिल्हा सरचिटणीस तथा अमरनाथ यात्री संघाचे अध्यक्ष धर्मभूषण ॲड. दिलीप ठाकूर यांनी केले आहे.