देगलूर प्रतिनिधी: राष्ट्रीय पत्रकार दिनाचे औचित्य साधून देगलूर येथील सामाजिक कार्यकर्ते तथा पत्रकार धनाजी जोशी यांनी पत्रकारांच्या सन्मानार्थ विशेष कार्यक्रमाचे आयोजन केले. यावेळी उपस्थित पत्रकारांना पुष्पगुच्छ व भेटवस्तू देऊन सन्मानित करण्यात आले.
समाजातील राजकीय, सामाजिक क्षेत्रातील अनेक मान्यवरांना राष्ट्रीय पत्रकार दिनाचा विसर पडत असताना, पत्रकारांच्या कार्याची दखल घेऊन त्यांचा सन्मान करण्याचा उपक्रम धनाजी जोशी यांनी राबविल्याबद्दल उपस्थित पत्रकारांनी समाधान व्यक्त केले. इतर वेळी प्रसिद्धीसाठी पुढाकार घेणारे अनेकजण पत्रकार दिनासारख्या महत्त्वाच्या प्रसंगी मात्र पत्रकारांकडे दुर्लक्ष करतात, अशी खंत व्यक्त करत धनाजी जोशी यांनी पत्रकारांना दिलेल्या सन्मानाबद्दल त्यांचे विशेष कौतुक करण्यात आले.
कार्यक्रमात दैनिक लोकमतचे पत्रकार राजू ताटे यांनी राष्ट्रीय पत्रकार दिनाचे महत्त्व विशद करून कार्यक्रमाच्या आयोजनाबद्दल समाधान व्यक्त केले. तर इरशाद पटेल यांनी प्रास्ताविकातून कार्यक्रमाची भूमिका मांडली.
यावेळी राजू ताटे (दैनिक लोकमत), गजानन बिडकर (महिमा खादीचा), शहाजी वरखिंडे (शिवगर्जना), इरशाद पटेल (लोकपत्र), इस्माईल खान पठाण (लोकन्याय), शेख जावेद (दैनिक त्रिशक्ती), शेख असलम (त्रिसंगम वार्ता), आजीम अन्सारी (जगमित्र), शेख सैफ (टीव्ही टेन) यांच्यासह देगलूर येथील पत्रकार उपस्थित होते.
पत्रकारांच्या कार्याचा सन्मान आणि त्यांच्या योगदानाची जाणीव करून देणारा हा उपक्रम उत्साहपूर्ण वातावरणात पार पडला.
