मुंबई, दि. २९ : हॉकी खेळातील जादूगर म्हणून नावाजलेले मेजर ध्यानचंद यांचा आज २९ ऑगस्ट हा जन्मदिन सर्व देशभर राष्ट्रीय क्रीडा दिन म्हणून साजरा केला जातो. त्यानिमित्ताने क्रीडा व युवक कल्याण मंत्री गिरीष महाजन यांच्या उपस्थितीत विविध कार्यक्रमांचे आयोजन करण्यात आले आहे.
जिल्हा क्रीडा अधिकारी, मुंबई शहर यांच्या कार्यालयाच्यावतीने क्रीडा व युवक कल्याण मंत्री गिरीष महाजन यांच्या शुभहस्ते मुंबई हॉकी स्टेडियम, चर्चगेट येथे सकाळी ९वा. मेजर ध्यानचंद यांचे प्रतिमेस वंदन करुन राष्ट्रीय क्रीडा दिनाची सुरुवात होणार आहे.
त्यानंतर डॉन बॉस्को स्कूल, माटुंगा येथे सकाळी १० वा. क्रीडा मंत्री यांच्या हस्ते मुंबई शहरातील नावाजलेले खेळाडू व मार्गदर्शक यांचा सत्कार होणार आहे. तसेच कबड्डी, फुटबॉल व हॉकी खेळांचे सामने सुरु होणार आहेत. या कार्यक्रमाकरीता शालेय शिक्षण व क्रीडा विभागाचे सचिव, मुंबई विभागाचे क्रीडा युवक सेवा उपसंचालक यांची उपस्थिती असणार आहे.
