परभणी प्रतिनिधी , दि.०७: अनुसूचित जाती व नवबौद्ध घटकांच्या स्वयंसहाय्यता बचत गटांनी मिनी ट्रॅक्टर व त्याची उपसाधने यांचा पुरवठा करण्याच्या योजनेचा लाभ घेण्याचे आवाहन समाजकल्याण विभागाच्या सहायक आयुक्त यांनी केले आहे. स्वयंसहाय्यता बचत गटांना त्यांचे आर्थिक उत्पन्न वाढावे या हेतूने अनुसूचित जाती व नवबौद्ध घटकांच्या स्वयंसहाय्यता बचत गटांना ९० टक्के अनुदानावर ९ ते १८अश्वशक्तीच्या मिनी ट्रॅक्टर व त्याची उपसाधने कल्टिव्हेटर किंवा रोटॅव्हेटर व ट्रेलर यांचा पुरवठा करण्यात येणार आहे.
या योजनेमध्ये अनुदानांची रक्कम ही शासन निर्णयानुसार कमाल मर्यादा रुपये ३.१५ लाख एवढी असेल. लाभार्थी स्वयंसहाय्यता बचत गटाने या योजनेअंतर्गत अनुज्ञेय असलेल्या किमान ९ ते १८ अश्वशक्तीपेक्षा जादा अश्वशक्तीचे ट्रॅक्टर व त्याची उपसाधने खरेदी करता येतील. मात्र त्याची या योजनेअंतर्गत अनुज्ञेय असलेल्या अनुदान (रु. ३.१५ लाख) पेक्षा जास्त असलेली रक्कम संबंधीत बचत गटाने स्वत: खर्च करावी लागेल. स्वयंसहाय्यता बचत गटांतील किमान ८० टक्के सदस्य अनुसूचित जाती व नवबौद्ध घटकांतील असावेत.
स्वयंसहाय्यता बचत गट हे संबंधित कार्यालयातील नोंदणीकृत बचत गट असावे. अनूसूचित जाती व नवबौध्द घटकांच्या स्वयंसहाय्यता बचत गटातील सदस्य हे महाराष्ट्र राज्याचे रहिवासी असावेत. जे स्वयंसहाय्यता बचत गट या योजनेसाठी इच्छुक असतील त्यांनी नमूद केलेले कागदपत्र लेखी अर्जासह सहाय्यक आयुक्त, समाजकल्याण कार्यालय, परभणी यांच्याकडे ३० सप्टेंबर, २०२२ पर्यंत कार्यालयीन वेळेत सादर करावे. तसेच अधिक माहितीसाठी समाज कल्याण कार्यालय, परभणी यांच्याकडे संपर्क साधावा असे आवाहन सहाय्यक आयुक्त, समाजकल्याण कार्यालय, परभणी यांनी केले आहे.
