देगलूर प्रतिनिधी दि.०१:-देगलूर शहरात शासकीय तंत्रनिकेतन सुरू करण्याची मागणी स्थानिक समाजसेवक दिगंबर रमेशराव कौरवार यांनी राज्याचे उपमुख्यमंत्री तथा अर्थमंत्री अजितदादा पवार यांच्याकडे लेखी निवेदनाद्वारे केली आहे.
निवेदनात त्यांनी म्हटले आहे की, देगलूर शहर तीन राज्यांच्या सीमेलगत असून, व्यापारी पेठ व शैक्षणिक क्षमतेच्या दृष्टीने नांदेड जिल्ह्यात महत्त्वाचे केंद्र ठरले आहे. त्यामुळे नांदेड आणि लगतच्या तेलंगणा, कर्नाटक या राज्यातील विद्यार्थ्यांना देगलूर येथे शिक्षण घेण्यासाठी सोय होते. तथापि, शासकीय तंत्रनिकेतन संस्था नसल्यामुळे विद्यार्थ्यांना उच्च तांत्रिक शिक्षणासाठी जिल्ह्याबाहेर जावे लागते.
कौरवार यांनी नमूद केले आहे की, काही खाजगी औद्योगिक प्रशिक्षण संस्था (आयटीआय) कार्यरत असल्या तरी शासकीय तंत्रनिकेतनाची गरज अत्यावश्यक आहे. ग्रामीण व सीमाभागातील विद्यार्थ्यांना यामुळे मोठा फायदा होईल.
त्यामुळे देगलूर येथे शासकीय तंत्रनिकेतन सुरू करण्याचा निर्णय तातडीने घ्यावा, अशी मागणी या निवेदनातून करण्यात आली आहे.