दारू दुकानातील वादाने घेतले विक्राळ रूप; धारदार शस्त्राने युवकाची हत्या, आरोपीचा पोलिस ठाण्यात शरणागती
देगलूर (प्रतिनिधी), दि.१०:- शहरातील अंबिका ऑईल मिलजवळील देशी दारू दुकानात (दि. ९) सकाळी किरकोळ वादाने विक्राळ रूप धारण केले. या वादात एका तरुणाचा धारदार शस्त्राने वार करून जागीच खून करण्यात आला.
या घटनेने देगलूर शहर हादरले असून परिसरात तणावाचे वातावरण निर्माण झाले आहे. विशेष म्हणजे, गुन्हा करून आरोपी स्वतःहून पोलिस ठाण्यात जाऊन शरण आला.
खून झालेल्या तरुणाची ओळख शेख निसार शेख बाबूमिया (वय ३०, रा. मदीना मस्जिद, लाईन गल्ली, देगलूर) अशी असून, शेख शादुल सलीमसाब (वय ४५, रा. आनंदनगर, भायेगाव रोड, देगलूर) असे आरोपीचे नाव आहे. पोलिसांनी त्याला ताब्यात घेतले आहे.
मिळालेल्या माहितीनुसार, दोघांमध्ये काही दिवसांपासून मनोमिळाव्याचा वाद सुरू होता. आज सकाळी दारू दुकानात पुन्हा त्यांच्यात बाचाबाची झाली आणि रागाच्या भरात आरोपी शादुल याने धारदार हत्याराने निसारच्या मानेवर वार केला. गंभीर जखमेमुळे निसारचा जागीच मृत्यू झाला.
घटनेची माहिती मिळताच पोलीस निरीक्षक मारुती मुंडे यांच्या मार्गदर्शनाखाली पीएसआय गोपाळ सूर्यवंशी यांचे पथक घटनास्थळी दाखल झाले. पंचनामा व साक्षीदारांच्या चौकशीदरम्यान आरोपी स्वतः पोलिस ठाण्यात आला आणि गुन्ह्याची कबुली दिली.
या घटनेनंतर शहरात भीतीचे वातावरण निर्माण झाले असून, पोलिसांनी संवेदनशील भागात बंदोबस्त वाढवला आहे. पुढील तपास सुरू आहे.