नांदेड प्रतिनिधी दि.१७ :- मराठी लोककलेचा आत्मा असलेल्या लावणीला समाजात सन्मानाचे व प्रतिष्ठेचे स्थान मिळावे, तसेच नव्या पिढीपर्यंत ही समृद्ध परंपरा पोहोचावी या उद्देशाने सौ. प्रगती बालाजी निलपत्रेवार यांच्या पुढाकारातून आयोजित “सांस्कृतिक लावण्यखणी” हा भव्य लावणी कार्यक्रम रविवारी शंकरराव चव्हाण प्रेक्षागृहात मोठ्या उत्साहात पार पडला. गच्च भरलेल्या सभागृहात महिला-पुरुष रसिकांनी भरभरून प्रतिसाद देत लोककलेवरील आपले प्रेम व्यक्त केले.
या कार्यक्रमाचे आयोजन प्रसाद व अथर्व निलपत्रेवार यांनी केले. प्रारंभी नटराज पूजन व दीपप्रज्वलन करण्यात आले. उद्घाटन माजी जिल्हा परिषद सदस्या प्रणिता देवरे यांच्या हस्ते झाले, तर अध्यक्षस्थानी महानगरपालिकेचे अतिरिक्त आयुक्त गिरीश कदम होते. प्रमुख अतिथी म्हणून लायन्स क्लबचे उपप्रांतपाल योगेश जायस्वाल, ॲड. गजानन पिंपरखेडे, सुरेखा हंबर्डे, राजेश जाधव, रमेश चवरे व डॉ. जुगल धुत उपस्थित होते.
प्रणिता देवरे यांनी लावणी ही केवळ मनोरंजन नसून मराठी संस्कृतीचे प्रतिबिंब असल्याचे नमूद करत आयोजकांच्या प्रयत्नांचे कौतुक केले. प्रास्ताविकात प्रगती निलपत्रेवार यांनी लोककलेचे जतन-संवर्धन आणि कलाकारांना मानाचे व्यासपीठ देण्याची भूमिका स्पष्ट केली. कार्यक्रमाच्या शेवटी बालाजी निलपत्रेवार यांनी आभार मानले. सूत्रसंचालन धर्मभूषण ॲड. दिलीप ठाकूर यांनी अभ्यासपूर्ण व ओघवत्या शैलीत केले.
लावणी क्वीन भाग्यश्री मुंबईकर, सोनी सोलापूरकर, पल्लवी जाधव तसेच अश्विनी, श्रद्धा व त्यांच्या संचाने सादर केलेल्या लावण्यांना प्रेक्षकांनी उस्फूर्त दाद दिली. “वन्स मोअर”च्या मागणीने कार्यक्रमाची रंगत वाढली. तरुणाईसह ज्येष्ठ, महिला व कुटुंबीयांची मोठी उपस्थिती लावणीला सुसंस्कृत व्यासपीठ मिळाल्याचे दर्शवित होती.
कार्यक्रम यशस्वी करण्यासाठी अनेक सहकाऱ्यांनी विशेष परिश्रम घेतले. रसिकांनी आयोजकांचे अभिनंदन करत भविष्यातही अशाच दर्जेदार, सांस्कृतिक कार्यक्रमांच्या सातत्याची अपेक्षा व्यक्त केली.