पंडित दीनदयाल उपाध्याय स्मृती प्रतिष्ठानचा पत्रकारांसाठी सन्मान.
नांदेड प्रतिनिधी, दि.२२:- पत्रकारिता क्षेत्रात उल्लेखनीय व सातत्यपूर्ण कार्य करणाऱ्या माध्यम प्रतिनिधींना पं. दीनदयाल उपाध्याय स्मृती प्रतिष्ठानच्या वतीने दिला जाणारा सुधाकर पत्रभूषण पुरस्कार जाहीर करण्यात आला आहे.
वर्ष २०२२ साठी दै. लोकमत समाचारचे पन्नालाल शर्मा, वर्ष २०२३ साठी अभय कुळकजाईकर, वर्ष २०२४ साठी दै. एकमतचे चारुदत्त चौधरी, वर्ष २०२५ साठी दै. सत्यप्रभाचे संतोष पांडागळे तर वर्ष २०२६ साठी दै. सकाळचे रामेश्वर काकडे यांची या प्रतिष्ठेच्या पुरस्कारासाठी निवड करण्यात आली आहे.
नरेंद्र–देवेंद्र महोत्सवाचे स्वागताध्यक्ष शिवप्रसाद राठी व संयोजक धर्मभूषण ॲड. दिलीप ठाकूर यांनी संयुक्त पत्रकार परिषदेत ही घोषणा केली.
प्रत्येक पुरस्काराचे स्वरूप रोख रु. ५,०००, स्मृतीचिन्ह, मानपत्र व महावस्त्र असे असून, हा सन्मान २१ व २२ फेब्रुवारी २०२६ रोजी कै. चंद्रभागा केरबा गंजेवार नगरी, नवा मोंढा मैदान, नांदेड येथे होणाऱ्या “नरेंद्र–देवेंद्र महोत्सव” या दोन दिवसीय काव्य मैफिलीत हजारो रसिकांच्या साक्षीने मान्यवरांच्या हस्ते प्रदान करण्यात येणार आहे.
पत्रकारिता क्षेत्रात मैलाचा दगड ठरलेले कै. सुधाकरराव डोईफोडे यांच्या स्मृतीप्रित्यर्थ दरवर्षी हा पुरस्कार देण्यात येतो. यापूर्वी गोवर्धन बियाणी, प्राचार्य देवदत्त तुंगार, विजय जोशी, पंढरीनाथ बोकारे, अनिल कसबे, कालिदास जहागीरदार, सुनील जोशी आदी मान्यवर पत्रकारांना या पुरस्काराने सन्मानित करण्यात आले आहे.
यंदा निवड झालेल्या पत्रकारांनी आपल्या कार्यकाळात राजकीय, सामाजिक, सांस्कृतिक, शैक्षणिक व ग्रामीण प्रश्नांवर वस्तुनिष्ठ, निर्भीड आणि समाजाभिमुख पत्रकारिता केली असून, त्यांच्या योगदानाचा गौरव म्हणून हा सन्मान दिला जात असल्याचे आयोजकांनी सांगितले.
पुरस्कारार्थी पत्रकारांची ओळख
◆ पन्नालाल शर्मा (दै. लोकमत समाचार) – पुरस्कार वर्ष २०२२
एम.कॉम., डी.एड., एम.ए. (हिंदी), बी.जे., एम.जे. अशी शैक्षणिक पात्रता असलेले पन्नालाल शर्मा हे गेल्या २५ वर्षांपासून दै. लोकमत समाचारमध्ये वरिष्ठ उपसंपादक म्हणून कार्यरत आहेत. हिंदी, मराठी, इंग्रजी व राजस्थानी भाषांवर त्यांचे प्रभुत्व आहे. मारवाडी समाज गौरव, सिंधी समाज पुरस्कार, नांदेड पोलीस पुरस्कार, तिरंगा परिवार पुरस्कार व डॉ. शंकरराव चव्हाण पत्रकारिता पुरस्काराने ते सन्मानित झाले असून, त्यांच्या अनेक बातम्या राज्यभर गाजलेल्या आहेत.
◆ अभय कुळकजाईकर – पुरस्कार वर्ष २०२३
१९९३ पासून पत्रकारितेत सक्रिय असलेले अभय कुळकजाईकर यांनी बी.एस्सी., पत्रकारिता पदविका, बी.जे. व एम.जे. पूर्ण केले आहे. एकमत (लातूर), लोकसत्ता (पुणे) आणि सकाळ (नांदेड) येथे त्यांनी महत्त्वाच्या जबाबदाऱ्या सांभाळल्या. लोकसभा व विधानसभा निवडणुकांचे विशेष वार्तांकन, राजकीय विश्लेषण, तसेच अखिल भारतीय मराठी साहित्य व नाट्य संमेलनाचे वार्तांकन ही त्यांची खास ओळख आहे. सध्या ते दैनिक पुण्यनगरीत कार्यरत आहेत.
◆ चारुदत्त लक्ष्मीकांत चौधरी (दै. एकमत) – पुरस्कार वर्ष २०२४
नांदेड पत्रकारितेतील विश्वासार्ह व अनुभवी नाव असलेले चारुदत्त चौधरी हे गेल्या चार दशकांपासून पत्रकारितेत कार्यरत आहेत. बी.कॉम. व बी.जे. पात्रता प्राप्त केलेल्या चौधरी यांनी देशोन्नतीमध्ये आवृत्ती प्रमुख म्हणून उल्लेखनीय कामगिरी केली. सध्या ते दै. एकमतचे आवृत्ती प्रमुख आहेत. मराठवाडा क्रांतीवीर, रामेश्वर बियाणी, अविष्कार फाउंडेशन, कृष्णाई व पांपटवार जीवनगौरव पुरस्कारांनी त्यांचा गौरव झाला आहे.
◆ संतोष रामराव पांडागळे (दै. सत्यप्रभा) – पुरस्कार वर्ष २०२५
ग्रामीण पत्रकारितेतून वाटचाल सुरू करून आज दै. सत्यप्रभाचे कार्यकारी संपादक म्हणून कार्यरत असलेले संतोष पांडागळे यांनी लोकाभिमुख पत्रकारितेचा ठसा उमटवला आहे. डॉ. शंकरराव चव्हाण यांच्या जन्मशताब्दीनिमित्त १०० पानी विशेषांक प्रकाशित करून त्यांनी पत्रकारितेतील विक्रम प्रस्थापित केला. सध्या ते नांदेड जिल्हा मराठी पत्रकार संघाचे अध्यक्ष असून विविध सामाजिक व संस्थात्मक जबाबदाऱ्या सांभाळत आहेत.
◆ रामेश्वर बालाजीराव काकडे (दै. सकाळ) – पुरस्कार वर्ष २०२६
दै. सकाळ, नांदेडचे जिल्हा प्रतिनिधी असलेले रामेश्वर काकडे हे एम.ए., बी.एड., बी.जे. (गोल्ड मेडलिस्ट), एम.जे. व एल.एल.बी. अशी भक्कम शैक्षणिक पात्रता असलेले अभ्यासू पत्रकार आहेत. लोकमत व नवराष्ट्रमध्ये कार्यानुभव घेतल्यानंतर गेल्या अनेक वर्षांपासून सकाळमध्ये ते कार्यरत आहेत. वस्तुनिष्ठ, अचूक व समाजाभिमुख लेखन ही त्यांची पत्रकारितेची ओळख आहे.