देगलूर प्रतिनिधी :- महाराष्ट्र राज्य महिला आयोगाच्या अध्यक्षा पदासाठी ज्योतीताई विनायक मेटे यांच्या नियुक्तीची मागणी जोर धरत आहे. कॅप्टन प्रकरणात नाव आल्याने रूपाली चाकणकर यांनी राजीनामा दिल्यानंतर निर्माण झालेली पोकळी भरण्यासाठी सक्षम नेतृत्वाची गरज व्यक्त केली जात आहे.
याच पार्श्वभूमीवर देगलूर येथील शिवगर्जना न्यूजचे संपादक शहाजी ना. वरखिंडे यांनी सहकाऱ्यांसह उपजिल्हाधिकारी, देगलूर यांच्या मार्फत मुख्यमंत्री देवेंद्र फडणवीस, उपमुख्यमंत्री सुनेत्रा पवार व उपमुख्यमंत्री एकनाथ शिंदे यांना निवेदन सादर केले.
निवेदनात म्हटले आहे की, महिला आयोग हे महिलांच्या हक्कांचे संरक्षण व न्याय मिळवून देणारे महत्त्वाचे व्यासपीठ असून या पदावर अभ्यासू व समाजकार्यात निपुण नेतृत्व आवश्यक आहे. ज्योतीताई मेटे यांनी शासकीय सेवेत तसेच समाजकार्यात महत्त्वपूर्ण काम केले असून महिलांच्या सक्षमीकरणासाठी त्यांचे योगदान उल्लेखनीय आहे.
त्या स्वर्गीय विनायक मेटे यांच्या पत्नी असून सध्या शिवसंग्राम संघटनेच्या राष्ट्रीय अध्यक्षा आहेत. त्यामुळे त्यांची महिला आयोगाच्या अध्यक्षा पदासाठी नियुक्ती करावी, अशी मागणी निवेदनातून करण्यात आली आहे.
या निवेदनावर शहाजी वरखिंडे यांच्यासह ॲड. इर्शाद पटेल, शशिकांत पटणे, सुभाष वाघमारे, मारुती कुडकेवार, पिराजी इबीतवार, नागेश पलपवार आदी पत्रकारांच्या स्वाक्षऱ्या आहेत.