नांदेड प्रतिनिधी:– हिंदू मुलींमध्ये जागृती निर्माण करण्याच्या उद्देशाने धर्मभूषण ॲड. दिलीप ठाकूर यांच्या पुढाकारातून आयोजित ‘केरला स्टोरी पार्ट टू’ या चित्रपटाचे पाच मोफत शो अभूतपूर्व प्रतिसादात हाऊसफुल्ल झाले. या उपक्रमाची दखल घेत भाजपा प्रदेश उपाध्यक्ष ॲड. चैतन्यबापू देशमुख यांनी दिलीप ठाकूर यांना पद्म पुरस्कारासाठी राज्यपालांमार्फत शिफारस करण्याचा प्रयत्न करणार असल्याचे सांगितले.
सोमवार, दि. ३० मार्च रोजी पिव्हीआर सिनेमा येथे भाजपा नांदेड महानगर, लायन्स क्लब नांदेड सेंट्रल आणि अमरनाथ यात्री संघ यांच्या संयुक्त विद्यमाने सकाळी ७ ते दुपारी २ या वेळेत विविध स्क्रीनवर पाच शो प्रदर्शित करण्यात आले. पहाटेपासूनच मुलींची मोठी गर्दी उसळली आणि सर्व शो हाऊसफुल्ल झाले.
पहिल्या शोचे उद्घाटन संत बाबा बलविंदरसिंघ यांच्या हस्ते झाले. यावेळी ॲड. चैतन्यबापू देशमुख यांच्यासह अनेक मान्यवर उपस्थित होते. कार्यक्रमस्थळी मुलींचे पारंपरिक औक्षण करून स्वागत करण्यात आले. घोषणांनी आणि पुष्पवृष्टीमुळे वातावरण उत्साहपूर्ण झाले, तर आकर्षक रांगोळीने सांस्कृतिक रंगत वाढवली.
चित्रपटादरम्यान अनेक मुली व महिलांनी भावनिक प्रतिक्रिया व्यक्त केल्या. ‘लव्ह जिहाद’ विरोधात सजग राहण्याची शपथ हा कार्यक्रमातील विशेष ठळक क्षण ठरला. कार्यक्रमानंतर उपस्थित मुलींनी उत्स्फूर्त प्रतिक्रिया देत या उपक्रमाचे कौतुक केले.
मोफत तिकीट वितरणासाठी अनेक सामाजिक कार्यकर्त्यांनी सहकार्य केले. तसेच विविध मान्यवरांचा सत्कार करण्यात आला. कार्यक्रमाचे सूत्रसंचालन धीरज स्वामी यांनी केले, तर आभार प्रदर्शन राजेशसिंह ठाकूर यांनी केले.
या उपक्रमामुळे मुलींमध्ये सामाजिक भान, सांस्कृतिक मूल्ये आणि जागरूकतेचा संदेश प्रभावीपणे पोहोचल्याचे दिसून आले. दिलीप ठाकूर यांच्या या पुढाकाराचे सर्व स्तरातून कौतुक होत आहे.