धर्माबाद प्रतिनिधी :- धर्माबाद–कुंडलवाडी मार्गावर १५ मार्च रोजी झालेल्या भीषण अपघातात गंभीर जखमी झालेल्या एका तरुणाचा जीव वाचवत स्थानिक डॉक्टरांनी मानवतेचे अनोखे उदाहरण घालून दिले आहे. वेळेवर उपचार, तातडीचा निर्णय आणि निस्वार्थ सेवा यामुळे तरुणाला मृत्यूच्या दारातून परत आणण्यात यश आले असून, डॉक्टर मोरे यांना परिसरात ‘देवदूत’ अशी उपाधी मिळत आहे.
पाटोदा (थडी) येथील व्यंकट तेजराव बोंबले (वय ३७) हे १५ मार्चच्या पहाटे धर्माबादकडे येत असताना शेळगावजवळ अचानक समोर आलेल्या कुत्र्याला वाचवण्याच्या प्रयत्नात त्यांचे वाहन अनियंत्रित झाले. या अपघातात त्यांच्या डोक्याला गंभीर दुखापत झाली तसेच नाक, कान आणि तोंडातून मोठ्या प्रमाणात रक्तस्त्राव सुरू झाला. त्यांची प्रकृती अत्यंत चिंताजनक बनली होती.
अपघातानंतर नातेवाईकांनी त्यांना तातडीने धर्माबाद येथील आलेख्या हॉस्पिटलमध्ये दाखल केले. रुग्णाची गंभीर अवस्था पाहताच डॉक्टर मोरे यांनी कोणताही विलंब न करता प्राथमिक उपचार सुरू केले. रक्तस्त्राव नियंत्रणात आणत त्यांनी परिस्थितीचे गांभीर्य ओळखून नांदेड येथील न्यूरोसर्जनशी तातडीने संपर्क साधला.
यानंतर डॉक्टर मोरे स्वतः रुग्णासोबत ॲम्बुलन्सने नांदेडला रवाना झाले. तेथे सीटी स्कॅननंतर तातडीने शस्त्रक्रिया करण्यात आली. अवघ्या दीड तासांत शस्त्रक्रिया यशस्वी ठरली आणि रुग्णाचा जीव वाचवण्यात डॉक्टरांना यश आले.
या संपूर्ण उपचार प्रक्रियेत डॉक्टर मोरे यांनी कोणतीही फी स्वीकारली नाही. “रुग्ण पूर्णपणे बरा होऊन स्वतः चालत दवाखान्यात येईल तेव्हाच फी घेईन,” अशी त्यांची भूमिका असल्याचे सांगण्यात आले.
दरम्यान, ६ एप्रिल रोजी रुग्ण पूर्णपणे बरा झाल्यानंतर त्याने कुटुंबीयांसह डॉक्टर मोरे यांची भेट घेतली. या वेळी डॉक्टरांनी “तुमचा पुनर्जन्म झाला आहे” असे म्हणत आनंद साजरा केला. विशेष म्हणजे या प्रसंगीही त्यांनी फी घेण्यास नकार दिला.
रुग्ण व्यंकट बोंबले यांनी भावुक होत “डॉक्टर मोरे यांच्या वेळेवर केलेल्या उपचारांमुळे मला नवजीवन मिळाले,” अशी कृतज्ञता व्यक्त केली.
आजच्या व्यापारीकरणाच्या युगात निस्वार्थ सेवेचे हे उदाहरण समाजासाठी प्रेरणादायी ठरत असून, “डॉक्टर म्हणजे देवदूत” ही भावना पुन्हा एकदा अधोरेखित झाली आहे.