नांदेड प्रतिनिधी:– मुलींमध्ये वाढत असलेल्या गर्भाशयाच्या कर्करोगाच्या प्रतिबंधासाठी एक महत्त्वपूर्ण पाऊल उचलत भारतीय जनता पक्ष, लायन्स क्लब, अमरनाथ यात्रेकरू संघ आणि मनपा यांच्या संयुक्त विद्यमाने मोफत एचपीव्ही (ह्युमन पॅपिलोमा व्हायरस) लसीकरण शिबिराचे आयोजन करण्यात आले आहे. हे शिबिर शुक्रवार, दि. १७ एप्रिल रोजी सकाळी ९ ते ११ या वेळेत शिवशक्तीनगर, नांदेड येथे पार पडणार आहे, अशी माहिती धर्मभूषण ॲड. दिलीप ठाकूर यांनी दिली.
या शिबिरात विशेषतः १४ ते १५ वर्षे वयोगटातील मुलींना प्राधान्य देण्यात येणार असून त्यांना गार्डासिल-४ ही लस मोफत दिली जाणार आहे. ही लस एचपीव्ही विषाणूच्या प्रकार १६ आणि १८ पासून संरक्षण देते, जे गर्भाशयाच्या कर्करोगासाठी सुमारे ७० टक्के जबाबदार मानले जातात.
खा. अशोकराव चव्हाण, खा. डॉ. अजित गोपछडे, प्रदेश उपाध्यक्ष संजय कोडगे, चैतन्य देशमुख, माजी पालकमंत्री डी. पी. सावंत, भाजपा जिल्हाध्यक्ष डॉ. संतुकराव हंबर्डे, ॲड. किशोर देशमुख, महापौर कविता मुळे, उपमहापौर दीपकसिंह रावत, सभागृह नेते ॲड. महेश कनकदंडे आणि लायन्स उपप्रांतपाल योगेश जायस्वाल यांच्या मार्गदर्शनाखाली हा उपक्रम राबविण्यात येत आहे.
महाराष्ट्र शासनाच्या आरोग्य विभागामार्फत सुरू असलेल्या या मोहिमेचा उद्देश मुलींना एचपीव्ही संसर्गापासून संरक्षण देऊन भविष्यातील आरोग्य सुरक्षित करणे हा आहे. राज्यात सुमारे ९.८४ लाख मुलींना लसीकरणाचे उद्दिष्ट ठेवण्यात आले असून ही मोहीम मिशन मोडमध्ये राबविण्यात येत आहे.
लसीकरण पूर्णपणे मोफत असून यू-विन पोर्टलवर नोंदणी करून लसीकरणानंतर डिजिटल प्रमाणपत्र दिले जाणार आहे. पालकांनी कोणतीही भीती न बाळगता आपल्या मुलींना या शिबिरात सहभागी करून घ्यावे, असे आवाहन करण्यात आले आहे. शिबिरासाठी येताना मुलींनी आधार कार्ड सोबत आणणे आवश्यक आहे.
“एक डोस – आयुष्यभराची सुरक्षा” हा संदेश देत या उपक्रमाला नागरिकांनी उत्स्फूर्त प्रतिसाद द्यावा, असे आवाहन आयोजकांनी केले आहे.