नांदेड प्रतिनिधी: भारतीय जनता पक्षाचे जिल्हा सरचिटणीस धर्मभूषण ॲड. दिलीप ठाकूर आणि महिला मोर्चा प्रदेश चिटणीस सुमती व्याहाळकर यांच्या पुढाकारातून आयोजित करण्यात आलेले मोफत एचपीव्ही लसीकरण शिबिर उत्साहात पार पडले. ज्येष्ठ विधिज्ञ ॲड. रमेश माने यांच्या हस्ते शिबिराचे उद्घाटन झाले, तर डॉ. रमेश नारलावार यांच्या अध्यक्षतेखाली व शीतल खांडील यांच्या प्रमुख उपस्थितीत कार्यक्रम संपन्न झाला.
गर्भाशयाच्या कर्करोगापासून संरक्षणासाठी आयोजित या महत्त्वपूर्ण उपक्रमांतर्गत १४ ते १५ वयोगटातील २७ मुलींना सुमारे ₹४५०० किंमतीची एचपीव्ही लस मोफत देण्यात आली. शिवशक्तीनगर परिसरात आयोजित या शिबिराला मुलींचा उत्स्फूर्त प्रतिसाद मिळाला.
भाजप नांदेड महानगर, लायन्स क्लब नांदेड सेंट्रल, अमरनाथ यात्रेकरू संघ आणि मनपा नांदेड यांच्या संयुक्त विद्यमाने हे शिबिर पार पडले. या उपक्रमासाठी खा. अशोकराव चव्हाण, खा. डॉ. अजित गोपछडे, प्रदेश उपाध्यक्ष संजय कोडगे, चैतन्य देशमुख, माजी पालकमंत्री डी. पी. सावंत, भाजपा जिल्हाध्यक्ष डॉ. संतुकराव हंबर्डे, ॲड. किशोर देशमुख तसेच महापौर कविता मुळे, उपमहापौर दीपकसिंह रावत, सभागृह नेते ॲड. महेश कनकदंडे आणि लायन्स उपप्रांतपाल योगेश जायस्वाल यांचे मार्गदर्शन लाभले.
संयोजक ॲड. दिलीप ठाकूर यांनी शिबिरामागील उद्दिष्ट स्पष्ट करताना, समाजात कर्करोग प्रतिबंधाबाबत जनजागृती होणे ही काळाची गरज असल्याचे सांगितले. वैद्यकीय आरोग्य अधिकारी डॉ. हनुमंत रिठे आणि डॉ. रितेशसिंह बिसेन यांनी एचपीव्ही लसीबाबत पसरलेल्या गैरसमजुती दूर करण्याचे आवाहन केले.
कार्यक्रमादरम्यान विविध मान्यवरांचा शिरोपाव व मोत्याची माळ देऊन सत्कार करण्यात आला. तसेच लस घेतलेल्या मुलींना गुलाब पुष्प देऊन गौरविण्यात आले.
कार्यक्रमाचे सूत्रसंचालन राजेशसिंह ठाकूर यांनी केले, तर आभार नरसिंह कहाळेकर यांनी मानले. मनपा कर्मचारी व स्वयंसेवकांनी शिबिर यशस्वी करण्यासाठी मोलाचे योगदान दिले.
नांदेड शहरात कर्करोग प्रतिबंधासाठी अशा प्रकारचे हे पहिलेच शिबिर ठरले असून, या उपक्रमाबद्दल सर्व स्तरांतून ॲड. दिलीप ठाकूर यांचे कौतुक होत आहे.