केज येथे प्रा. माणिकराव आनंदगावकर यांच्या ‘गोडवा’ हायकू काव्यसंग्रहाचे थाटात प्रकाशन.
केज प्रतिनिधी :- केज तालुक्यातील आनंदगाव येथील भूमिपुत्र, सेवानिवृत्त प्राध्यापक तथा कवी प्रा. माणिकराव आनंदगावकर लिखित ‘गोडवा’ या हायकू काव्यसंग्रहाचा प्रकाशन सोहळा रविवारी (दि. ७ जून) केज येथील कानडी रोडवरील उत्सव फंक्शन हॉलमध्ये उत्साहपूर्ण वातावरणात संपन्न झाला. पुणे येथील अनुबंध प्रकाशन तर्फे प्रकाशित करण्यात आलेल्या या काव्यसंग्रहाच्या प्रकाशन कार्यक्रमाचे आयोजन मराठवाडा साहित्य परिषद (म.सा.प.) केज शाखेच्या वतीने करण्यात आले होते.
कार्यक्रमाच्या अध्यक्षस्थानी जी. बी. गदळे हे होते. प्रमुख पाहुणे म्हणून ज्येष्ठ साहित्यिक डॉ. दीपकराव कासराळीकर, जयंतराव वाकोडकर, मराठवाडा साहित्य परिषदेचे कार्यकारिणी सदस्य दगडू दादा लोमटे तसेच म.सा.प. केज शाखेचे अध्यक्ष प्रा. डॉ. नवनाथ काशीद उपस्थित होते. मान्यवरांच्या हस्ते ‘गोडवा’ काव्यसंग्रहाचे विधिवत प्रकाशन करण्यात आले.
यावेळी बोलताना जयंतराव वाकोडकर यांनी वाचन संस्कृतीचे महत्त्व अधोरेखित केले. “आजच्या काळात पालकांनी मुलांना वाचनासाठी प्रोत्साहित करणे आवश्यक आहे. साहित्य माणसाला नवी ऊर्जा देते आणि पुस्तकांच्या सहवासामुळे तो वैचारिकदृष्ट्या समृद्ध होतो,” असे ते म्हणाले.
प्रसिद्ध समीक्षक व साहित्यिक डॉ. दीपकराव कासराळीकर यांनी प्रा. आनंदगावकर यांच्या लेखनशैलीचे कौतुक करताना सांगितले की, “आशय आणि अभिव्यक्ती यांच्या अद्वैतातून कविता जन्माला येते. अत्यल्प शब्दांत नेमका आशय व्यक्त करण्याची कला म्हणजे हायकू. ‘गोडवा’मधील हायकूंमध्ये माणूसपण, मिश्किलता आणि सामाजिक जाणीवा प्रभावीपणे व्यक्त झाल्या असून या संग्रहातून समाजमनाचे दर्शन घडते.”
अध्यक्षीय समारोपात जी. बी. गदळे यांनी प्रा. आनंदगावकर यांच्या साहित्यिक प्रवासाचा गौरव करताना सांगितले की, “‘कुंपण’ आणि ‘अस्तित्व’ या काव्यसंग्रहांनंतर हायकूसारख्या अल्पाक्षरी काव्यप्रकारातून समाजमनाचा वेध घेण्याचा त्यांचा प्रयत्न निश्चितच कौतुकास्पद आहे. केजच्या साहित्यविश्वात आज हायकूचा नवा तुरा रोवला गेला आहे.”
कार्यक्रमास कवी गोरख शेंद्रे, राजेसाहेब पापा देशमुख, पत्रकार श्रावणकुमार जाधव, चंद्रकांत पाटील, अक्षर परिवारचे विष्णू यादव, विक्रम डोईफोडे, किशोर भालेराव, महादेव ढाकणे, प्रा. अनिल गायकवाड, प्रा. सोळंके, प्रा. गित्ते, लोखंडे, वेदपाठक, किशोर गोले आदी मान्यवर उपस्थित होते.
यावेळी कवी जनार्दन सोनवणे आणि कविता गोले यांनी ‘गोडवा’मधील निवडक हायकूंचे रसपूर्ण वाचन करून उपस्थितांची दाद मिळवली. सकाळी ११ वाजता सुरू झालेल्या या कार्यक्रमास केज शहर व परिसरातील साहित्यप्रेमी, लेखक, कवी, प्राध्यापक आणि नागरिक मोठ्या संख्येने उपस्थित होते.
कार्यक्रमाचे प्रास्ताविक उदय कुलकर्णी यांनी केले. प्रमुख पाहुण्यांचा परिचय कवी हनुमंत घाडगे यांनी करून दिला. सूत्रसंचालन प्रा. डॉ. हनुमंत सौदागर यांनी केले, तर आभार प्रदर्शन महेश दादा आनंदगावकर यांनी केले. कार्यक्रमाच्या यशस्वी आयोजनासाठी निखिल आनंदगावकर, रवी गायकवाड तसेच मराठवाडा साहित्य परिषद, केज शाखेच्या पदाधिकाऱ्यांनी व सदस्यांनी विशेष परिश्रम घेतले. पसायदानाने कार्यक्रमाची सांगता झाली.