देगलूरच्या आजी-आजोबांचा नातू ठरला जगाच्या बुद्धिबळपटावरचा तारा!
देगलूरच्या मातीत रुजलेली परंपरा आणि आजी-आजोबांचे संस्कार घेऊन वाढलेला विहान राहुल अस्पतवार याने एफआयडीई क्लासिकल रेटिंग मिळवत आंतरराष्ट्रीय बुद्धिबळपटू म्हणून नोंद केली आहे. या उल्लेखनीय यशामुळे देगलूरसह सिंधुदुर्ग जिल्ह्याचाही गौरव वाढला आहे.
विहानचे वडील राहुल संग्राम अस्पतवार हे गेल्या १५ वर्षांपासून सिंधुदुर्ग येथे प्राथमिक शिक्षक म्हणून कार्यरत आहेत. मात्र, विहानची मूळ नाळ देगलूरशीच जोडलेली आहे. त्याचे आजोबा, दिवंगत संग्राम हाशन्ना अस्पतवार हे देगलूरमधील परिचित व्यक्तिमत्त्व होते, तर आजी श्रीमती निरूपमा संग्राम अस्पतवार यांनी अनेक वर्षे अंगणवाडी सेविका म्हणून समाजसेवा केली आहे.
आज सिंधुदुर्ग ही विहानची कर्मभूमी असली, तरी त्याच्या या यशाने वडिलांची जन्मभूमी देगलूर आणि त्याची कर्मभूमी सिंधुदुर्ग या दोन्ही जिल्ह्यांची मान अभिमानाने उंचावली आहे.
वयाच्या अवघ्या नवव्या वर्षी आंतरराष्ट्रीय बुद्धिबळ विश्वात स्वतःची ओळख निर्माण करणाऱ्या विहानचे यश हे जिद्द, सातत्य आणि कुटुंबीयांच्या संस्कारांचे फलित आहे. या चिमुकल्या बुद्धिबळपटूची भविष्यातील भरारी अशीच अधिक उंचावत राहो, हीच सर्व देगलूरकर आणि साप्ताहिक महिमा खादीचा संपूर्ण परिवारातर्फे मनापासून शुभेच्छा.