नांदेड शहरासह परिसरात मागील काही दिवसांपासून दुचाकी, लॅपटॉप आणि घरफोडीचे गुन्हे उघडकीस आणण्याबाबत मा. डॉ. नीलाभ रोहन, पोलीस अधीक्षक, नांदेड यांनी स्थानिक गुन्हे शाखा यांना आदेशीत केले होते. त्याअनुषंगाने स्थानिक गुन्हे शाखा येथील पथकाने तीन आरोपींकडुन एकूण तीन गुन्हे उघडकीस आले असून, त्यांच्याकडून एकुण 1 लाख 85 हजार रुपये किमतीचा चोरीचा मुद्देमाल जप्त करण्यात आला आहे.
दि. 05/09/2026 रोजी स्थानिक गुन्हे शाखेचे पोलीस उपनिरीक्षक साईनाथ पुयड आणि त्यांच्या पथकाला गोपनीय माहिती मिळाली की, काही संशयित इसम विना नंबर प्लेटच्या दुचाकीवरून हिंगोली गेट ते कोर्टाच्या पाठीमागील रस्त्यावर फिरत आहेत. या माहितीची तात्काळ दखल घेऊन, सदर पथक दोन पंचासह कोर्टाच्या पाठीमागे, आंध्र समिती शाळेच्या भिंतीजवळ सापळा लावला. काही वेळातच एका निळ्या रंगाच्या दुचाकीवर तीन इसम एका काळ्या रंगाच्या बॅगसह संशयास्पदरित्या थांबलेले आढळून आले.
पोलिसांनी त्यांना घेराव घालून ताब्यात घेतले. ताब्यात घेण्यात आलेल्या आरोपींची नावे 1) क्षितीज शरद कांबळे (वय 21. रा. प्रभातनगर, नांदेड) 2) समेध गोपाळ लांबा (वय 23, रा. प्रभातनगर, नांदेड) 3) गोविंद मनोज खंडागळे (वय 18, रा. सम्राट अशोक नगर, नांदेड) आशी सांगीतली. सुरुवातीला आरोपींनी पोलिसांना उडवाउडवीची उत्तरे दिली. मात्र, कायदेशीररित्या पंचनामा करून त्यांची कसून चौकशी केली असता, त्यांनी त्यांचे गुन्हे कबूल केले.
त्यांच्याकडून एकूण रु. 1,85,000/-किमतीचा मुद्देमाल जप्त करण्यात आला आहे. जप्त केलेल्या मुद्देमालाचा आणि उघडकीस आलेल्या गुन्ह्यांचा तपशील खालीलप्रमाणे आहे: 1) पोलीस स्टेशन भाग्यनगर गू.र.नं. 478/2026 कलम 305, 331 (4) BNS आरोपींनी बी.के. हॉल, श्रीनगर, नांदेड येथील एका बंद शटरचे दुकान फोडून दोन सोनी कॅमेरे (A6000 आणि M5 मॉडेल) व एक लेन्स चोरल्याचे कबूल केले. हा मुद्देमाल नमुद आरोपी यांच्याकडून जप्त करण्यात आला आहे. याची एकूण किंमत 1,15,000/- रुपये आहे. 2) पोलीस स्टेशन विमानतळ गू.र.नं. -406/2026 कलम 303 (2) BNS आरोपींनी एका घरासमोरून निळ्या रंगाची Activa स्कूटी चोरी केली होती. ही स्कूटी क्षितीज कांबळे याच्याकडून जप्त करण्यात आली आहे, जिची किंमत 40,000/- रुपये आहे.
या गुन्ह्यात आरोपी यश तारु (सध्या फरार) याचाही समावेश होता. 3) पोलीस स्टेशन भाग्यनगर गू.र.नं. 470/2026 कलम 303(2) BNS आरोपी क्रमांक 1 व 2 यांनी वेदांत येथील राज पार्कच्या पार्किंगमधून चोरी केल्याचे निष्पन्न झाले. सदर गुन्ह्यातील Splendor मोटारसायकल आधीच भाग्यनगर पोलीस स्टेशन येथे जप्त करण्यात आली आहे. 4) DELL लॅपटॉप चोरीः आरोपी क्षितीज कांबळे याच्याकडून एक काळ्या रंगाचा DELL कंपनीचा Vostro 15 मॉडेलचा लॅपटॉप जप्त करण्यात आला आहे, ज्याची किंमत 30,000/- रुपये आहे. हा लॅपटॉप पुण्यातील हिंजवडी येथून चोरी केल्याचे आरोपीने सांगितले आहे
जप्त करण्यात आलेला सर्व मुद्देमाल भाग्यनगर पोलीस स्टेशन, नांदेड आणि विमानतळ पोलीस स्टेशन, नांदेड यांच्याकडे सुपूर्द करण्यात आला आहे. ताब्यात घेण्यात आलेल्या तिन्ही आरोपींना पुढील कायदेशीर कार्यवाहीसाठी पोलीस स्टेशन भाग्यनगर यांच्या ताब्यात देण्यात आले आहे. या गुन्ह्यांचा अधिक तपास संबंधित पोलीस स्टेशनकडून करण्यात येत आहे. ही कामगिरी मा. डॉ. नीलाभ रोहन, पोलीस अधीक्षक, नांदेड यांच्या मार्गदर्शनाखाली, स्थानिक गुन्हे शाखेचे पोलीस निरीक्षक अतुल भोसले, पोलीस उपनिरीक्षक साईनाथ पुयड व त्यांच्या पथकातील पोलीस अंमलदार इमरान शेख, बालाजी कदम, प्रमोद जोंधळे, संतोष बेल्लुरोड, रवि हराळे, संदिप घोगरे, अमोल घेवारे यांनी केली आहे.