दुष्काळग्रस्त शेतकऱ्यांना तातडीने भरीव मदत देण्याची शिवसेनेची मागणी.
देगलूर प्रतिनिधी : महाराष्ट्र शासनाने दुष्काळ जाहीर करूनही दुष्काळग्रस्त शेतकरी व शेतमजुरांसाठी ठोस व भरीव मदत जाहीर केलेली नाही, असा आरोप करत शिवसेनेच्या वतीने रविवार, दि. २८ सप्टेंबर रोजी तहसील कार्यालयासमोर शासनाच्या जी.आर.ची होळी करून तीव्र निदर्शने करण्यात आली. शिवसेना उपजिल्हाप्रमुख महेश पाटील यांच्या नेतृत्वाखाली झालेल्या या आंदोलनामुळे तहसील परिसर घोषणांनी दणाणून गेला.
देगलूर तालुक्यात निर्माण झालेल्या गंभीर दुष्काळी परिस्थितीमुळे शेतकरी आर्थिक संकटात सापडला असून, शासनाने केवळ कागदोपत्री दुष्काळ जाहीर न करता प्रत्यक्ष शेतकऱ्यांना भरीव आर्थिक मदत द्यावी, अशी मागणी यावेळी करण्यात आली.
आंदोलकांनी प्रत्येक शेतकऱ्याला हेक्टरी एक लाख रुपये थेट मदत, सर्व शेतकऱ्यांचे पीक कर्ज माफ करणे, रब्बी हंगामासाठी आर्थिक मदत देणे तसेच खरीप हंगामातील पीक कर्ज माफ करण्याची मागणी केली. तसेच १०० टक्के पीकविमा रक्कम तात्काळ देण्यात यावी, अशी मागणीही करण्यात आली.
गावागावातील जळालेले रोहित्र (ट्रान्सफॉर्मर) २४ तासांत बदलण्यात यावेत, वीजबिल माफ करावे, जलसंधारणाची कामे तातडीने सुरू करावीत, दुष्काळग्रस्त भागात पिण्याच्या पाण्याची व्यवस्था करावी आणि जनावरांसाठी चारा छावण्या सुरू कराव्यात, अशी मागणी आंदोलकांनी केली.
दुष्काळी परिस्थितीतही बँकांकडून शेतकऱ्यांवर कर्जवसुलीसाठी दबाव आणला जात असून, घरांवर जप्तीच्या नोटिसा लावण्यात येत असल्याचा आरोप यावेळी करण्यात आला. कर्जवसुलीच्या नोटिसा तात्काळ थांबवाव्यात, अशी मागणीही करण्यात आली. शेतकऱ्यांनी खरीप पिकांसाठी केलेला खर्च आणि डोक्यावर असलेला कर्जाचा डोंगर यामुळे कुटुंबाचा उदरनिर्वाह कसा करायचा, असा प्रश्न निर्माण झाला आहे. त्यामुळे शासनाने महिन्याच्या आत दुष्काळग्रस्त शेतकऱ्यांसाठी विशेष आर्थिक पॅकेज जाहीर करावे, अशी मागणी शिवसेनेच्या वतीने करण्यात आली.
यासोबतच शेतमजुरांना २५ हजार रुपयांची तातडीची आर्थिक मदत देण्यात यावी आणि त्यांच्या हाताला रोजगार उपलब्ध करून द्यावा, अशी मागणीही करण्यात आली. यावेळी विविध मागण्यांच्या समर्थनार्थ जोरदार घोषणाबाजी करण्यात आली. या आंदोलनात देगलूर शिवसेना तालुकाप्रमुख बालाजी पाटील इंगळे खुतमापुरकर, विधानसभा मतदारसंघ प्रमुख पांडुरंग पाटील थडके देगावकर, विधानसभा मतदारसंघ संघटक राजेंद्र इंगळे खानापूरकर,
शहरप्रमुख भगवान जाधव, युवा सेना तालुकाप्रमुख तथा शिवसेना सोशल नेटवर्कर प्रमुख भागवत पाटील सोमुरकर, शहर संघटक मष्णाजी पैलावार, विभागप्रमुख राजू उल्लेवार, उपविभागप्रमुख शंकर जाधव, युवा सेना विभागप्रमुख राजू पाटील जाधव हाळीकर, शिवसेना पदाधिकारी शंकर पवार, शिवाजी सोनकांबळे मुजळगेकर, उपविभागप्रमुख नागनाथ विभुते, उपविभागप्रमुख हानमंत पुजंपवार, उपविभागप्रमुख सुभाष खुनेवाड माळेगांवकर यांच्यासह शेतकरी, शेतमजूर व शिवसैनिक मोठ्या संख्येने उपस्थित होते.