देगलूर प्रतिनिधी: देगलूर आगारातून हैदराबादकडे पूर्वी सात ते आठ बसफेऱ्या नियमित सुरू होत्या. मात्र आगार तोट्यात असल्याचे कारण देत या बसफेऱ्या बंद करण्यात आल्याने महाराष्ट्रासह तेलंगणातील प्रवाशांची मोठी गैरसोय झाली आहे.
विशेष म्हणजे देगलूर बसस्थानकासमोरूनच दररोज डझनावारी खासगी क्रुझर, ट्रॅव्हलर आणि इतर प्रवासी वाहने हैदराबादच्या दिशेने धावत आहेत. तसेच शंकरनगर, मुक्रामाबाद, नरसी, मुखेड आदी परिसरातूनही देगलूरमार्गे हैदराबादकडे मोठ्या प्रमाणात खासगी प्रवासी वाहतूक सुरू आहे.
यामुळे नागरिकांचा थेट सवाल आहे की, एसटी बस तोट्यात जात असल्याचे सांगितले जाते, तर याच मार्गावर धावणाऱ्या खासगी प्रवासी वाहनांना दररोज एवढ्या मोठ्या प्रमाणात प्रवासी कुठून मिळतात?
यात आणखी एक महत्त्वाचा मुद्दा म्हणजे तेलंगणातील अनेक दैनंदिन नोकरीपेशा प्रवासी महाराष्ट्राच्या बसने प्रवास करण्यास प्राधान्य देतात. प्रवाशांच्या म्हणण्यानुसार, महाराष्ट्राच्या बसेस वेळेचे नियोजन पाळत असल्याने रोजच्या नोकरीसाठी ये-जा करणाऱ्यांना त्याचा फायदा होत होता. विशेष म्हणजे तेलंगणामध्ये स्थानिक प्रवाशांना काही सवलती उपलब्ध असतानाही अनेक प्रवासी महाराष्ट्राची बस निवडून तिकीट काढून प्रवास करत होते.
“तेलंगणात सवलत उपलब्ध असतानाही आम्ही महाराष्ट्राच्या एसटीचे तिकीट काढून प्रवास करतो. मग अशा परिस्थितीत या मार्गावरील बससेवा तोट्यात कशी जाते?” असा सवाल तेलंगणातील काही प्रवाशांकडून उपस्थित केला जात आहे.
एकीकडे प्रवाशांची मागणी असताना एसटीच्या बसफेऱ्या बंद होतात आणि दुसरीकडे त्याच मार्गावर खासगी प्रवासी वाहतूक मोठ्या प्रमाणात सुरू राहते, हा विरोधाभास आता चर्चेचा विषय बनला आहे.
देगलूर आगाराचा तोटा नेमका कोणत्या कारणामुळे होतो? प्रवाशांची कमतरता आहे, वेळापत्रकाचा प्रश्न आहे की व्यवस्थापनातील काही त्रुटी आहेत? याची वरिष्ठ अधिकाऱ्यांनी सखोल चौकशी करून वस्तुस्थिती जनतेसमोर स्पष्ट करावी, अशी मागणी होत आहे.
“एसटीला प्रवासी मिळत नाहीत, तर खासगी गाड्या प्रवाशांनी भरून कशा धावतात? आणि तेलंगणातील प्रवासीही तिकीट काढून महाराष्ट्राच्या बसने प्रवास करण्यास तयार असताना एसटी तोट्यात कशी?” असा सवाल आता नागरिक आणि प्रवाशांकडून उपस्थित होत असून, या प्रकरणात नेमके कुठे पाणी मुरतेय का? याची चौकशी होणे गरजेचे असल्याची भावना व्यक्त होत आहे.