नवरात्रोत्सवानिमित्त आयोजन; कीर्तनानंतर महाप्रसाद, नऊ भाग्यवान भक्तांना आकर्षक भेटवस्तू.
नांदेड प्रतिनिधी : नवरात्रोत्सवाचे औचित्य साधून नांदेड–उस्मानाबाद महामार्गावरील लोंढेसांगवी फाटा, ता. लोहा येथील कुबेरनगरी येथे शुक्रवार, दि. १६ ऑक्टोबर २०२६ रोजी दुपारी ४ वाजता समाजप्रबोधनकार ह.भ.प. निवृत्ती महाराज इंदोरीकर यांच्या भव्य कीर्तन सोहळ्याचे आयोजन करण्यात आले आहे. कीर्तनानंतर भाविकांसाठी महाप्रसादाची व्यवस्था करण्यात आली असून, वेळेवर उपस्थित राहणाऱ्या नऊ भाग्यवान भक्तांची सोडतीद्वारे निवड करून त्यांना आकर्षक नवरात्र भेट देण्यात येणार आहे, अशी माहिती स्वागताध्यक्ष सतीश सुगनचंदजी शर्मा आणि संयोजक धर्मभूषण ॲड. दिलीप ठाकूर यांनी दिली.
इंदोरीकर महाराज आपल्या विनोदी शैलीतून, मार्मिक उदाहरणांद्वारे भक्ती, संस्कार, कौटुंबिक मूल्ये आणि सामाजिक प्रबोधनाचे महत्त्व पटवून देतात. त्यांच्या कीर्तनातून जीवनाला योग्य दिशा देणारा संदेश मिळत असल्याने त्यांचा मोठा चाहतावर्ग आहे. या सोहळ्यात ह.भ.प. शिवाजी महाराज महादेव पिंपळगावकर यांच्या मार्गदर्शनाखाली भजनी मंडळ व टाळकरी सहभागी होणार असून, भजन आणि टाळांच्या गजरात परिसरात भक्तिमय वातावरण निर्माण होणार आहे.
कुबेरनगरीचे मुख्य प्रवर्तक सतीश सुगनचंदजी शर्मा यांच्या पुढाकारातून मध्यमवर्गीय कुटुंबांना परवडणाऱ्या दरात प्लॉट्स व रो-हाऊसेस उपलब्ध करून देण्याचा प्रयत्न सुरू आहे. तसेच प्रा. कैलाश राठोड यांच्या सहकार्याने परिसरात पोद्दार इंग्लिश स्कूल सुरू करण्याची योजनाही आहे.
या कीर्तन सोहळ्याचा लाभ घेण्यासाठी नांदेड जिल्ह्यासह लोहा तालुका आणि परिसरातील भाविकांनी मोठ्या संख्येने उपस्थित राहावे, असे आवाहन आयोजकांनी केले आहे. भक्ती, संस्कार आणि समाजप्रबोधनाचा संगम असलेला हा कार्यक्रम नवरात्रोत्सवातील विशेष आकर्षण ठरणार आहे.