देगलूर प्रतिनिधी,दि.१८ :- देगलुर तालुक्यातील चर्चेचा विषय ठरलेल्या लख्खा येथील २०१९ पासून प्रलंबित रस्ता व पुलाच्या कामाला अखेर आज प्रत्यक्ष सुरुवात झाली. गेल्या अनेक वर्षांपासून या कामासाठी स्थानिक नागरिकांनी निवेदन आणि शेवटी उपोषणाचा मार्ग अवलंबला होता.
या उपोषणाला तालुक्यातील सर्वच राजकीय पक्षांनी एकदिलाने पाठिंबा दर्शवला होता. प्रशासनाला रस्त्याचे काम मार्गी लावण्याची ठाम विनंती करण्यात आली.
या मागणीची दखल घेत माननीय उपजिल्हाधिकारी अनुप पाटील, तहसीलदार भरत सूर्यवंशी, मा. पोलीस निरीक्षक मारुती मुंडे, उपनिरीक्षक फड साहेब तसेच संपूर्ण तालुका प्रशासनाने सकारात्मक प्रतिसाद दिला.
उपोषणकर्त्यांच्या मागणीला केवळ ४८ तासांच्या आत मान्यता देत आज रस्त्याच्या कामाला प्रत्यक्ष प्रारंभ करण्यात आला. त्यामुळे गावकऱ्यांत आनंदाचे वातावरण पसरले.
कामाच्या सुरुवातीचा आनंद व्यक्त करण्यासाठी लख्खा गावात ढोल-ताशांच्या गजरात उपोषणकर्त्याची व गावकऱ्यांची भव्य मिरवणूक काढण्यात आली. या मिरवणुकीत सर्व समाजघटकांचा उत्स्फूर्त सहभाग होता.