देगलूर प्रतिनिधी,दि.२६ :- शहरातील मुख्य बाजारपेठेतील मच्छी मार्केट चौकात, लाला अग्रवाल यांच्या दुकानासमोर मागील चार दिवसांपासून नाली स्वच्छतेसाठी खड्डे टाकण्यात आले असून, अद्याप त्याची दुरुस्ती किंवा झाकणाची कोणतीही कार्यवाही झाली नाही, अशी माहिती स्थानिक व्यापाऱ्यांनी दिली.
या ठिकाणचा रस्ता आधीच अरुंद असून, सध्या नवरात्र महोत्सवानिमित्त बाजारात मोठी गर्दी होत आहे. अशा परिस्थितीत या उघड्या खड्ड्यांमुळे अपघात होण्याची शक्यता नाकारता येत नाही. स्थानिक नागरिक व व्यापाऱ्यांमध्ये याबाबत नाराजी दिसून येत आहे.
तातडीने खड्डे बुजवावेत किंवा योग्य झाकण बसवावे.संबंधित नगर परिषद अधिकाऱ्यांनी लक्ष घालून सुरक्षिततेची हमी द्यावी.अशा उघड्या खड्ड्यांमुळे नागरिकांचे व वाहनचालकांचे जीव धोक्यात येत आहेत.
नागरिकांनी या प्रकाराची लक्षवेधी सूचना संबंधित नगर परिषद अधिकाऱ्यांकडे दिली असून, तातडीने उपाययोजना करण्याची मागणी केली आहे.