अजित पवार गटाची देगलूरमध्ये शक्ती प्रदर्शन – कार्यालयाचे भव्य उद्घाटन.
टेकाळे बंधूंच्या एकजुटीने पक्षाला बळ
देगलूर प्रतिनिधी,दि.१८:- देगलूर शहरात राष्ट्रवादी काँग्रेस पक्ष (अजित पवार गटाच्या) कार्यालयाचे उद्घाटन मोठ्या जल्लोषात पार पडले.
माजी खासदार भास्करराव पाटील खतगावकर यांच्या हस्ते या कार्यालयाचे उद्घाटन करण्यात आले. यावेळी आयोजित पत्रकार परिषदेत बोलताना आमदार चिखलीकर यांनी नांदेड जिल्ह्यात “एकला चलो रे”चा स्पष्ट संदेश देत अजित पवार गट स्वतंत्रपणे मजबूतपणे उभा राहणार असल्याचे संकेत दिले.
अलिकडेच टेकाळे बंधू या गटात प्रवेश केल्यानंतर देगलूर तालुका व शहरातील राजकीय समीकरणांना मोठी कलाटणी मिळाली आहे.
टेकाळे बंधू मधील आपसी मतभेद दूर होऊन ते एकत्र आल्यानंतर अजित पवार गटाचे वर्चस्व अधिक बळकट झाल्याचे स्पष्टपणे दिसत आहे.
याच पार्श्वभूमीवर देगलूर नगरपरिषद निवडणुकीच्या तयारीत या गटाने आक्रमक भूमिका घेतली असून १३ प्रभागांमध्ये आपल्या प्रभावी उमेदवारांना उभे करून बहुमताने निवडून आणले जाण्याची शक्यता वर्तवली.
या उद्घाटन सोहळ्याला आमदार प्रताप पाटील चिखलीकर,माजी खासदार व जिल्ह्यातील ज्येष्ठ नेते भास्करराव पाटील खतगावकर, माजी आमदार सुभाष साबणे, जिल्हाध्यक्ष शिवराज पाटील होटाळकर, महाराष्ट्राचे सरचिटणीस दिलीपराव धर्माधिकारी, लक्ष्मीकांत पदमवार,
अंकुश देसाई, बालाजी अण्णा टेकाळे, खुशी सेवाभावी संस्थेचे अध्यक्ष बबलू टेकाळे, देवेंद्र मोतेवार नाना मोरे, समीभाई अन्सारी, यांच्यासह अनेक पदाधिकारी आणि शेकडो कार्यकर्त्यांची उपस्थिती होती.कार्यालयाच्या उद्घाटनानंतर लगेचच पत्रकार परिषद घेण्यात आली.
अजित पवार गटाच्या इच्छुक उमेदवारांच्या शक्तीप्रदर्शनामुळे देगलूर परिसरात उत्सुकता वाढली असून स्थानिक राजकारणात नवीन समीकरणे तयार होण्याची चिन्हे स्पष्टपणे दिसत आहेत.