नांदेड दि.१९ :-फटाका असोसिएशनचे संस्थापक अध्यक्ष धनराज मंत्री व धर्मभूषण ॲड. दिलीप ठाकूर यांच्या संकल्पनेतून यंदा “अनाथ मुला-मुलींची अनोखी दिवाळी” हा उपक्रम आगळ्या-वेगळ्या पद्धतीने साजरा करण्यात आला. या उपक्रमाअंतर्गत ना. हेमंतभाऊ पाटील व आ. आनंदराव बोंढारकर यांच्या हस्ते 60 अनाथ मुला-मुलींना फटाके, नवीन कपडे आणि मिठाईचे वाटप करण्यात आले.
हा कार्यक्रम स्टेशन रोडवरील गुरुद्वारा मैदानावरील फटाका बाजारात पार पडला.कार्यक्रमाच्या व्यासपीठावर सतीश शर्मा, रहाटे साहेब, संतोष मानधने, प्रतापसिंग खालसा, गुरु भाई, विशाल फाजगे, सुषमा हुरणे, सुरेश शर्मा, संतोष भारती, लालबाजी घाटे व दिनकर सर आदी मान्यवर उपस्थित होते.
मान्यवरांचा शाल, पुष्पगुच्छ व मोत्याच्या माळेने सत्कार करण्यात आला.हा सत्कार धनराज मंत्री, आयुष मंत्री, गणेश मंत्री, अनिल मंत्री, सिद्धेश्वर पेटकर, महेश देबडवार, अनिकेत परदेशी, शुभम परदेशी, शुभम वट्टमवार, विशाल मुत्तेपवार, अजय ठाकुर, संदिप रायेवार, संजय गायकवाड, आनंद मुथा, शेख साद्दुला, शेख युसूफ, चिद्रावार, शेख अमजद, विजय मुथा व पियुष मंत्री यांनी केला.
प्रास्ताविकात धनराज मंत्री यांनी फटाका व्यापाऱ्यांना येणाऱ्या अडचणींचा उल्लेख केला.त्यावर ना. हेमंतभाऊ पाटील म्हणाले, “अनाथांची अनोखी दिवाळी हा अतिशय स्तुत्य उपक्रम आहे. फटाका व्यापाऱ्यांच्या अडचणींवर मी स्वतः अधिकाऱ्यांशी चर्चा करणार आहे.”
आ. आनंदराव बोंढारकर यांनी सांगितले, “अशा उपक्रमांची गरज प्रत्येक ठिकाणी आहे. फटाका असोसिएशनच्या पाठीशी मी सदैव उभा राहीन.”
या वेळी सुमन मुलींचे बालगृह व लहुजी साळवे अनाथ आश्रम, धनगरवाडी येथील मुलांना नवीन कपडे, मिठाईचे डबे व फटाके देण्यात आले.कार्यक्रमाचे संचालन ॲड. दिलीप ठाकूर यांनी केले, तर आभार प्रदर्शन आयुष मंत्री यांनी मानले.
दिवाळीच्या पहिल्याच दिवशी अनपेक्षित भेटवस्तूंमुळे अनाथ मुलांच्या चेहऱ्यावर आनंद फुलून आला.कार्यक्रम यशस्वी करण्यासाठी फटाका असोसिएशनच्या सर्व सदस्यांनी अथक मेहनत घेतली.
चहा-फराळानंतर कार्यक्रमाची सांगता झाली. अनाथ मुलांसाठी आगळावेगळा उपक्रम राबवल्याबद्दल संयोजक धनराज मंत्री व ॲड. दिलीप ठाकूर यांचे सर्वत्र कौतुक होत आहे.