नांदेड प्रतिनिधी दि.१७ :- नांदेड महानगरपालिकेवर भाजपाचाच महापौर विराजमान व्हावा, या ठाम निर्धाराने भाजपा मध्यवर्ती निवडणूक प्रचार कार्यालय सुरू झाल्यापासून ते निकाल जाहीर होईपर्यंत सलग अकरा दिवस चोवीस तास कार्यालयातच मुक्काम ठोकून कार्यरत राहिल्याबद्दल भाजपा जिल्हा सरचिटणीस धर्मभूषण ॲड. दिलीप ठाकूर यांचा भाजपा महानगराध्यक्ष अमर राजुरकर यांच्या हस्ते सत्कार करण्यात आला. प्रचार कार्यालयालाच घर मानून क्षणोक्षणी बदलणाऱ्या राजकीय समीकरणांवर लक्ष ठेवत संपूर्ण प्रचार यंत्रणा अखंडपणे चालू ठेवण्याचे महत्त्वपूर्ण कार्य त्यांनी पार पाडले.
महानगरपालिका निवडणुकीदरम्यान माजी मुख्यमंत्री व खासदार अशोकराव चव्हाण, खासदार अजित गोपछडे, संघटन मंत्री संजय कोडगे, माजी मंत्री डी. पी. सावंत आणि महानगराध्यक्ष अमर राजुरकर यांनी मध्यवर्ती प्रचार कार्यालयाची संपूर्ण जबाबदारी दिलीप ठाकूर यांच्यावर सोपवली होती. बूथनिहाय नियोजन, कार्यकर्त्यांचा समन्वय, प्रचार साहित्याचे वितरण, बैठका, आढावे व रणनिती आखण्याचे काम त्यांनी अत्यंत शिस्तबद्ध पद्धतीने पार पाडले.
सन १९९५ पासून आतापर्यंत नऊ लोकसभा व आठ विधानसभा निवडणुकांचा प्रदीर्घ अनुभव असलेल्या दिलीप ठाकूर यांनी प्रत्येक निवडणुकीत नव्या पद्धतीने काम करत कार्यकर्त्यांमध्ये उत्साह निर्माण केला. अचूक रणनिती, काटेकोर नियोजन व दूरदृष्टीमुळेच त्यांची ओळख ‘इलेक्शनचे मास्टरमाईंड’ म्हणून प्रस्थापित झाली आहे.
महानगरपालिका निवडणुकीतील त्यांच्या अहोरात्र कार्याची दखल घेत हा सत्कार करण्यात आला. यावेळी भाजपा ग्रामीण जिल्हाध्यक्ष संतुकराव हंबर्डे, प्रदेश कार्यकारिणी सदस्य चैतन्य देशमुख, प्रा. नंदू कुलकर्णी, बालाजी बच्चेवार, व्यंकटेश साठे, बालाजीराव शिंदे, महानगर सरचिटणीस शितल खांडील, विजय गंभीरे, सुरेश लोट, बागड्या यादव, सतीश बेरुळकर, कामाजी सरोदे यांच्यासह अनेक पदाधिकाऱ्यांनी दिलीप ठाकूर यांच्या कार्याचे मुक्तकंठाने कौतुक केले.