नांदेड प्रतिनिधी दि.२५ :- वर्षभर अविरतपणे समाजहितासाठी झटणारे, सेवा हाच धर्म मानणारे जेष्ठ समाजसेवक धर्मभूषण ॲड. दिलीप ठाकूर यांना एकाच दिवशी नांदेड व परभणी येथे दोन मानाचे पुरस्कार मिळाल्याने सर्वत्र अभिनंदनाचा वर्षाव होत आहे. वर्षभरात तब्बल ९० सामाजिक उपक्रम राबवणाऱ्या या सेवाव्रती कार्यकर्त्याच्या पुरस्कारांची संख्या आता १०७ वर पोहोचली असून, त्यांच्या समाजकार्यातील अतुलनीय योगदानाची पुन्हा एकदा दखल घेण्यात आली आहे.
शनिवारी अल रहमान बहुउद्देशीय सेवाभावी संस्थेतर्फे वाजेगाव ता. जि. नांदेड येथे आयोजित कार्यक्रमात दिलीप ठाकूर यांना “वंचित जनकल्याण जीवन गौरव” पुरस्कार देऊन सन्मानित करण्यात आले. यावेळी प्रास्ताविक करताना डॉ. एम. टी. कदम यांनी सांगितले की, अति मागास व वंचित घटकांसाठी दिलीप ठाकूर करत असलेले कार्य खरोखरच जगावेगळे आहे.
“२२ लाख ‘भाऊचे डबे’ वाटप, दर महिन्याच्या पहिल्या सोमवारी भ्रमिष्टांसाठी राबविला जाणारा ‘कायापालट’ उपक्रम – या कार्याची तुलना कुठेच होऊ शकत नाही. म्हणूनच त्यांची या पुरस्कारासाठी निवड करण्यात आली आहे,” असे गौरवोद्गार त्यांनी काढले.
या प्रसंगी दत्तात्रय वालेकर, कवयित्री रूपाली वागरे, भाग्यश्री असोरे, संगीता बिडवई, संस्थेचे अध्यक्ष शेख यादुल शेख सरवर व अब्दुल वहाब यांच्या हस्ते स्मृतिचिन्ह, मानपत्र, महावस्त्र व पुष्पहार देऊन दिलीप ठाकूर यांचा गौरव करण्यात आला.
दरम्यान, शनिवारी परभणी येथील शिवराज्य प्रतिष्ठान निवासी गुरुकुलच्या सभागृहात जीवन सुरक्षा हेल्थकेअर ट्रस्टच्या वतीने मराठवाड्यातील विविध क्षेत्रात उल्लेखनीय कार्य करणाऱ्या मान्यवरांचा सन्मान सोहळा पार पडला. या कार्यक्रमात ३६५ दिवस चालणारे तीन उपक्रम सातत्याने राबविल्याबद्दल दिलीप ठाकूर यांना “जन भूषण राष्ट्रीय पुरस्कार” प्रदान करण्यात आला.
दिलीप ठाकूर यांच्या वतीने हा पुरस्कार त्यांचे लहान बंधू राजेशसिंह ठाकूर व सौ. बिना ठाकूर यांनी स्वीकारला. या सन्मानात रोख ₹ ५,०००, सन्मानपत्र, स्मृतिचिन्ह, स्नेहवस्त्र, पुष्पहार तसेच तुळशीचे रोपटे देण्यात आले. कार्यक्रमाच्या अध्यक्षस्थानी प्रवीण देशटवार होते. प्रमुख अतिथी म्हणून नाट्यकलावंत मधुकर उमरीकर, भानुसिंह चौहान, गुरुकुलचे संचालक ज्ञानेश्वर बर्वे, हनुमानसिंह चौहान, मयुरी बोबडे, चंद्रकला चौहान, कु. शुभिक्षा ठाकूर आदी मान्यवर उपस्थित होते.
एकाच दिवशी दोन प्रतिष्ठित पुरस्कार मिळणे हा योगायोग नसून, दिलीप ठाकूर यांच्या सेवाव्रती जीवनाची ही फलश्रुती आहे. वंचितांच्या जीवनात आशेचा दीप पेटवत ठेवणाऱ्या या समाजसेवकाला मिळालेला सन्मान म्हणजे माणुसकीच्या कार्याला मिळालेली पावती असल्याची भावना सर्वत्र व्यक्त होत आहे.