नांदेड प्रतिनिधी दि.१८ :- नवा मोंढा मैदान येथे दि. २१ व २२ फेब्रुवारी रोजी होणाऱ्या भव्य “नरेंद्र–देवेंद्र महोत्सवा”ची तयारी युद्धपातळीवर सुरू असून कै. चंद्रभागा केरबा गंजेवार नगरी येथे सर्व व्यवस्था सुसज्ज करण्यात आली आहे. या दोन दिवसीय सांस्कृतिक सोहळ्यासाठी पालकमंत्री, खासदार, आमदार तसेच विविध प्रशासकीय अधिकाऱ्यांनी उपस्थित राहण्यास संमती दिली असल्याची माहिती स्वागताध्यक्ष शिवप्रसाद राठी व संयोजक धर्मभूषण ॲड. दिलीप ठाकूर यांनी दिली.
या महोत्सवाला नांदेड जिल्ह्याचे पालकमंत्री अतुल सावे, राज्यसभा सदस्य डॉ. अजित गोपछडे, हळद संशोधन केंद्र अध्यक्ष हेमंत पाटील, भाजपा मराठवाडा संघटन मंत्री संजय कोडगे, आमदार डॉ. तुषार राठोड (मुखेड), भीमराव केराम (किनवट), राजेश पवार (नायगाव), जितेश अंतापुरकर (देगलूर), बालाजीराव कल्याणकर (नांदेड उत्तर), आनंदराव बोंढारकर (नांदेड दक्षिण), बाबुराव कदम (हदगाव) यांच्यासह जिल्हाधिकारी राहुल कर्डिले, पोलीस उप महानिरीक्षक शहाजी उमाप, पोलीस अधीक्षक अबिनाशकुमार, मुख्य कार्यकारी अधिकारी मेघना काहली, आयुक्त डॉ. महेशकुमार डोईफोडे, जत्थेदार संत बाबा बलविंदरसिंघ, भाजपा महानगराध्यक्ष अमर राजूरकर, जिल्हाध्यक्ष डॉ. संतुकराव हंबर्डे व ॲड. किशोर देशमुख, महापौर कविता मुळे, उपमहापौर दीपकसिंह रावत, सभागृह नेते ॲड. महेश कनकदंडे, सहाय्यक पोलीस अधीक्षक सुरज गुरव, अतिरिक्त आयुक्त गिरीश कदम, उपायुक्त अजितपालसिंघ संधू, तसेच विविध क्षेत्रातील मान्यवर उपस्थित राहणार आहेत.
दै. प्रजावाणीचे संपादक शंतनू डोईफोडे, कुबेर नगरीचे व्यवस्थापकीय संचालक सतीश सुगनचंद शर्मा, भगवती हॉस्पिटलचे डॉ. अंकुश देवसरकर, भाजपा कामगार आघाडी जिल्हाध्यक्ष सुरेश लोट, भाजपा दक्षिण विधानसभा प्रमुख डॉ. सचिन उमरेकर, प्रतिष्ठित व्यापारी अंबादास लालपोतू आदींचाही सहभाग राहणार आहे.
वेळेवर उपस्थित राहणाऱ्या रसिक प्रेक्षकांसाठी भाजपा कामगार आघाडीच्या वतीने सुरेश लोट यांच्या तर्फे १० कलर टीव्हींचे मोफत वाटप करण्यात येणार आहे.
शनिवार, दि. २१ फेब्रुवारी : चौदावा मराठी हास्य दरबार
पहिल्या दिवशी चौदावा मराठी हास्य दरबार रंगणार असून स्टँडअप कॉमेडीचे बादशहा बंडा जोशी, ‘झी हास्य सम्राट’मधील लोकप्रिय कलाकार सिद्धार्थ खिल्लारे, शाहीर रमेश गिरी रसिकांचे मनोरंजन करतील. तसेच ‘चला हवा येऊ दे’ फेम सतीश कासेवार यांचा खास महिलांसाठी “होम मिनिस्टर – खेळ पैठणीचा” हा कार्यक्रम होणार आहे. या कार्यक्रमात लालपोतू कलेक्शनतर्फे २५ पैठणी व ऑरगंज्या साड्या महिलांना मोफत देण्यात येणार आहेत.याच दिवशी रमेश पारसेवार, ॲड. गजानन पिंपरखेडे, रत्नाकर वाघमारे व गंगाप्रसाद तोष्णीवाल यांना “नांदेड भूषण” पुरस्काराने गौरविण्यात येणार आहे. तसेच “सुधाकर पत्रभूषण” पुरस्काराने पन्नालाल शर्मा, अभय कुळकजाईकर, चारुदत्त चौधरी, संतोष पांडागळे व रामेश्वर काकडे यांचा सन्मान करण्यात येणार आहे.
रविवार, दि. २२ फेब्रुवारी : चोवीसावे अखिल भारतीय विराट कविसंमेलन
दुसऱ्या दिवशी चोवीसावे अखिल भारतीय विराट कविसंमेलन होणार असून मेरठ (उ.प्र.) येथील हास्य संचालक व क्रांती कवी सौरभ जैन सुमन, जबलपूर (म.प्र.) येथील हास्य गीतकार सुदीप भोला, भिलवाडा (राजस्थान) येथील व्यंग्य कवी दीपक पारेख, मैनपुरी (उ.प्र.) येथील वीर रस कवी डॉ. मनोज चौहान, सुरत (गुजरात) येथील शृंगार रस कवयित्री सोनल जैन तसेच दिल्लीच्या वीर रस कवयित्री नेहा शर्मा ‘नमन’ यांचा सहभाग राहणार आहे.या दिवशी माजी मुख्यमंत्री अशोकराव चव्हाण यांना “नांदेड भूषण” पुरस्काराने सन्मानित करण्यात येणार असल्याची माहिती आयोजकांनी दिली.दोन दिवस चालणाऱ्या या भव्य सांस्कृतिक सोहळ्यास मोठ्या संख्येने उपस्थित राहण्याचे आवाहन पंडित दीनदयाल उपाध्याय स्मृती प्रतिष्ठान तर्फे करण्यात आले आहॆ.