देगलूर प्रतिनिधी : देगलूर येथील बँक ऑफ महाराष्ट्र शाखेचे होट्टलबेस हनुमान मंदिराजवळील प्रशस्त व सुसज्ज नव्या इमारतीत स्थलांतर करण्यात आले. नव्या वास्तूचे उद्घाटन जिल्हाधिकारी राहुल कर्डिले यांच्या हस्ते ऑनलाइन पद्धतीने करण्यात आले. शाखेच्या स्थलांतरामुळे ग्राहकांना अधिक चांगल्या, आधुनिक आणि सुलभ बँकिंग सुविधा उपलब्ध होणार असून व्यवहार अधिक वेगाने व सोयीस्कर पद्धतीने करता येणार आहेत.
उद्घाटन कार्यक्रमात बँक ऑफ महाराष्ट्रचे शाखाधिकारी लोकेश, उपशाखाधिकारी विनोद, अनुराधा थडके, सुनिता आलुरे, हणमंतराव पाटील, केरले आणि देविदास थडके यांची उपस्थिती होती. यावेळी भारतीय जनता पक्षाचे शहराध्यक्ष प्रशांत दासरवार, शहर चिटणीस दीपक संगमकर, एसआयआर विधानसभा प्रमुख सचिन कांबळे तसेच सामाजिक कार्यकर्ते धनाजी जोशी यांनी उपस्थित मान्यवरांचा भारतमातेची प्रतिमा भेट देऊन व भगवी शाल परिधान करून सत्कार केला.
कार्यक्रमात उपस्थित मान्यवरांनी बँकेच्या नवीन शाखेस शुभेच्छा देत ग्राहकाभिमुख सेवा, डिजिटल बँकिंगचा विस्तार आणि ग्रामीण तसेच शहरी भागातील नागरिकांना अधिक दर्जेदार आर्थिक सेवा उपलब्ध करून देण्यासाठी बँक ऑफ महाराष्ट्र सातत्याने प्रयत्नशील असल्याचे सांगितले. कार्यक्रम उत्साहपूर्ण वातावरणात पार पडला.