देगलूर प्रतिनिधी,दि.१४ :- देगलूर तालुक्यातील गवंडगाव-बोरगाव रस्ता क्र. ७४ वरील कि.मी. १/० ते १/२०० दरम्यान सुमारे १०० मीटर रस्ता जेसीबीने उकरून वाहतुकीस अडथळा निर्माण केला गेला.
५ जून २०२६ रोजी घडलेल्या या प्रकारानंतर दुसऱ्याच दिवशी जि.प. बांधकाम विभागाकडे लेखी तक्रार करण्यात आली. कनिष्ठ अभियंता आकाश पाटील यांनी पाहणी केली, मात्र ना रस्ता दुरुस्त झाला, ना दोषींवर कारवाई २ जुलैला एफआयआर दाखल करण्याची सूचना देऊनही गुन्हा नोंद न झाल्याने विभाग संबंधितांना पाठीशी घालत असल्याचा संशय नागरिकांनी व्यक्त केला आहे.
या मार्गावरून दररोज शेतकरी, विद्यार्थी व ग्रामस्थांची ये-जा होत असून शेतकामे व दैनंदिन व्यवहारांवर गंभीर परिणाम होत असल्याचे तक्रारदार दादाराव पांडुरंग गवंडगावकर यांनी सांगितले. वरिष्ठ स्तरावर निष्पक्ष चौकशी व तातडीने रस्ता खुला करण्याची मागणी त्यांनी केली आहे.