पुणे प्रतिनिधी: शहरातील कात्रज परिसरातून एक धक्कादायक घटना समोर आली आहे. सोशल मीडियावरून जुळलेल्या प्रेमसंबंधानंतर विवाह केलेल्या तरुणाने कथित कौटुंबिक छळाला कंटाळून आत्महत्या केल्याची घटना उघडकीस आली आहे.
मोहम्मद साद (वय 20) असे मृत तरुणाचे नाव असून, तो मूळचा नाशिक जिल्ह्यातील मालेगाव येथील रहिवासी होता. या प्रकरणी त्याचे वडील नौशाद तन्वीर अहमद यांनी आंबेगाव पोलीस ठाण्यात फिर्याद दिली आहे.
पोलिसांच्या माहितीनुसार, मोहम्मद साद याची ओळख सोशल मीडियावरून करीमुन्निशा ऊर्फ निशा खान हिच्याशी झाली होती. या ओळखीचे पुढे प्रेमात रूपांतर होऊन दोघांनी गेल्या वर्षी विवाह केला. विवाहानंतर साद पुण्यात येऊन रिक्षा चालवून उपजीविका करत होता.
मात्र, लग्नानंतर पत्नी व तिच्या माहेरच्या मंडळींकडून त्याला सतत मानसिक छळ सहन करावा लागत असल्याचा आरोप करण्यात आला आहे. या त्रासाला कंटाळून 12 मार्च रोजी पहाटे कात्रजमधील संतोषनगर परिसरात सादने आपल्या रिक्षामध्येच विषारी औषध प्राशन केले.
घटनेनंतर त्याला तातडीने रुग्णालयात दाखल करण्यात आले. काही दिवस उपचार सुरू असताना 18 मार्च रोजी त्याचा मृत्यू झाला.
या प्रकरणी पोलिसांनी एकूण सात जणांविरोधात गुन्हा दाखल केला असून त्यापैकी पाच जणांना अटक करण्यात आली आहे. अटक करण्यात आलेल्यांमध्ये पत्नी करीमुन्निशा खानसह इतर नातेवाईकांचा समावेश आहे.
या घटनेचा पुढील तपास पोलीस उपनिरीक्षक वाघमारे करत असून प्रकरणाची सखोल चौकशी सुरू आहे.