नांदेड प्रतिनिधी:- पती आणि नांदेड जिल्हा पुरवठा अधिकारी जगदीश बारदेवाड यांच्या विरोधात पत्नी सौ. दैवशाला बारदेवाड यांनी सुरू केलेले आमरण उपोषण चौथ्या दिवशीही जिल्हाधिकारी कार्यालयासमोर सुरूच आहे. न्याय मिळेपर्यंत मागे हटणार नाही, “प्राण गेला तरी चालेल पण उपोषण सोडणार नाही,” अशी ठाम भूमिका त्यांनी व्यक्त केली आहे.
दि. 6 एप्रिलपासून सुरू असलेल्या या उपोषणात त्या आपल्या लहान मुलांसह सहभागी झाल्या आहेत. पतीकडून मानसिक छळ, पालनपोषणाकडे दुर्लक्ष तसेच कुटुंबापासून दूर राहणे यासारख्या आरोपांवर आधारित विविध मागण्यांसाठी हे आंदोलन सुरू आहे.
त्यांच्या प्रमुख मागण्यांमध्ये मुलांच्या शिक्षण व पालनपोषणाचा खर्च, शैक्षणिक व कागदपत्रांसाठी आवश्यक सहकार्य, सेवा नोंदीत पत्नी व मुलांचे नाव समाविष्ट करणे, तसेच घराच्या थकीत हप्त्यांमुळे होणारी जप्ती टाळण्यासाठी आर्थिक जबाबदारी पूर्ण करणे यांचा समावेश आहे.
उन्हाळ्यामुळे उपोषणकर्त्या सौ. दैवशाला बारदेवाड यांची प्रकृती कमजोर होत असल्याचे दिसून येत आहे. मात्र, अद्याप कोणताही वरिष्ठ अधिकारी भेटीस आला नसल्याचा त्यांचा आरोप आहे.
या प्रकरणामुळे जिल्हा प्रशासनाच्या भूमिकेबाबत आणि न्याय प्रक्रियेबाबत चर्चेला उधाण आले असून, स्थानिक पातळीवर लोकप्रतिनिधींनी हस्तक्षेप करून न्याय मिळवून द्यावा, अशी मागणीही जोर धरू लागली आहे.
दरम्यान, जिल्हा पुरवठा अधिकारी यांच्याकडून यावर अद्याप कोणतेही अधिकृत भाष्य करण्यात आलेले नाही.