धर्माबाद प्रतिनिधी:- धर्माबाद शहरातील फुलेनगर परिसरात वारंवार होणाऱ्या वीजपुरवठा खंडित समस्येमुळे नागरिकांमध्ये तीव्र नाराजी व्यक्त होत असून, विज वितरण कंपनीविरोधात आंदोलनाचा इशारा देण्यात आला आहे.
सभापती तिमापुरे यांनी दिलेल्या निवेदनानुसार, फुलेनगर परिसरात गेल्या अनेक वर्षांपासून विजपुरवठा वारंवार खंडित होत आहे. सध्या या भागात सिंगल फेज लाईन असल्याने वीजपुरवठा सुरळीत राहत नसून नागरिकांना मोठ्या अडचणींचा सामना करावा लागत आहे.
या पार्श्वभूमीवर परिसरात तातडीने थ्री-फेज लाईन टाकण्यात यावी तसेच शासकीय विश्रामगृहासमोर नवीन 200 केव्ही क्षमतेची डिपी (ट्रान्सफॉर्मर) बसविण्याची मागणी करण्यात आली आहे. सध्या असलेली डीपी लोड सहन करू शकत नसल्याने दररोज सकाळ-संध्याकाळी LT वायर चिपकणे आणि फ्युज उडणे यासारख्या समस्या वारंवार उद्भवत असल्याचे निवेदनात नमूद करण्यात आले आहे.
या सततच्या तांत्रिक बिघाडांमुळे परिसरातील नागरिकांमध्ये संतापाची भावना वाढत असून, वीज वितरण कंपनीच्या कार्यपद्धतीवर प्रश्नचिन्ह उपस्थित केले जात आहे. “गोरगरीब नागरिकांची परीक्षा घेऊ नये,” अशी भावना नागरिकांमधून व्यक्त होत आहे.
तत्काळ उपाययोजना न केल्यास 7 मे 2026 रोजी वीज वितरण कंपनीच्या कार्यालयासमोर लोकशाही मार्गाने उपोषण करण्यात येईल, असा स्पष्ट इशारा सभापती तिमापुरे यांनी दिला आहे. दरम्यान, या मागणीवर वीज वितरण कंपनीकडून कोणती अधिकृत प्रतिक्रिया येते याकडे नागरिकांचे लक्ष लागले आहे.